BAUKAU, STLTIMORLESTE.com – Hospital Rejional Eduardo Ximenes (HoREX) Baukau daudaun nee menus kadeira ba familia sira neebe hein pasiente, nunee obrigatoriu tuur kama pasiente, maibe hetan presaun husi parte seguransa sira iha hospital refere.
“Iha sala ba inan no bebe, kadeira ba ami familia hein iha kama balun laiha kadeira, ami tenke tuur iha kama leten, maibe seguransa sira sempre duni tun ami,” hatete familia pasiente, Cristina Goncalves ba STL iha sala maternidade HoREX, Segunda (23/12/2024).
Nia preokupa ho kondisaun refere, mezmu kama no armariu iha sala maternidade sufisiente ba pasiente sira hodi toba no tau sasan, maibe menus kaderia ba familia sira hodi tuur hein pasiente neebe baixa, tanba la sufisiente.
Familia pasiente nee haktuir, pasiente inan ho bebe sira baixa iha sala refere ho kondisaun partus la hanesan, tanba iha inan gravida sira balun partus normal la too oras 24 alta hodi fila ba uma, maibe inan gravida neebe liu husi operasaun hafoin bebe moris prezisa baixa too semana, nunee menus kadeira difikulta familia sira neebe hein, obrigatoriu tenke tuur iha kama pasiente hodi hein pasiente.
“Husu ba sira labele mai duni deit ami, maibe haree saida mak iha sala ida nee, ami hein moras, laos hakarak mai deit iha nee, ami tuur mos la diak,” hateten Cristina
Nia husu ba parte Ministeriu Saude atu haree asuntu refere, tanba familia neebe hein moras prezisa tuur, laos hamriik hodi hein moras too alta.
Hatan ba kestaun nee, Diretor Ezekutivu HoREX Baukau, Claudio Ximenes rekonhese, sei menus kadeira ba familia hein pasiente sira, tanba HoREX hahu estabelese no hetan atribui kama ba pasiente husi Ministeriu Saude hamutuk 75 inklui armariu 75 no kadeira 75, neebe kada pasiente hetan kama 1, armariu rai sasan 1 no kadeira 1 ba familia pasiente tuur hodi hein moras.
“Ita nia pasiente iha nee barak liu entaun ita aumenta kama sira extra nee ita aumenta too tiha 150, entaun kama sira extra nee mak nia kadeira laiha,” hateten Claudio.
Menus kadeira, Dirijente nee preokupa, tanba familia hein pasiente sira tuur iha kama neebe pasiente sira toba ba, nee fo impaktu ba pasiente deskansa la seguru.
Nunee hatoo ona pedidu ba Nasional hodi Ministeriu Saude responde liu husi Orsamentu Jeral Estadu (OJE) 2025 neebe aprova ona.
Entretantu observasaun STL nian nota, kadeira ba familia pasiente sira iha sala maternidade HoREX menus, tanba iha kama ba pasiente hamutuk 18, maibe kadeira ba familia sira neebe hein pasiente ka ema moras sira iha deit 5, nunee obrigatoriu familia pasiente sira tuur iha kama neebe pasiente sira toba ba.
(EST 2)
