BAUKAU, STLTIMORLESTE.com – Hospital Rejional Eduardo Ximenes (HoREX) Baukau liu husi atendimentu emerjensia rejistu pasiente hamutuk nain 18 kompostu kanek todan no mate.
Mediku jeral iha sala emerjensia HoREX Baukau, Jeferino Marcos dos Reis Amaral hateten, hafoin asidente trafegu entre kareta bus ho bus soke malu iha area Wailakama loron 18 Dezembru 2025, parte loraik, sala emerjensia HoREX Baukau simu pasiente husi asindete refere hamutuk nain 18, maibe nain 1 ho kondisaun mate no nain 17 hetan tretamentu husi mediku sira.
“Atu relata deit ami nia atendimentu husi asidente nee total pasiente hamutuk 18, nain 1 mate fatin, todan nain 2, nain 6 alta ona, seluk nee ami halo observasaun rekupera sira bele fila ba ida-idak nia uma,” Jeferino informa ba jornalista sira hafoin remata fo atendimentu ba pasiente husi asidente Wailakama iha sala emerjensia HoREX Baukau, Kinta (18/12/2025)
Nia sublina, husi pasiente nain 2 neebe hetan kanek todan, nain 1 iha parte ulun no nain 1 seluk iha parte liman tohar kmaan no pasiente nain 6 mediku fo alta fila, tanba kondisaun diak, maibe iha pasiente sira seluk neebe hetan kanek natoon kontinua halo observasaun, enkuantu pasiente nain 2 seluk neebe kanek todan tenke baixa.
Nia fundamenta, pasiente nain 1 neebe too iha sala emerjensia HoREX Baukau ho kondisaun mate, tanba hetan pankada makaas iha parte kabun parte loos ho tipu emorajen interna neebe deskonfia afeta ba matebian nia orgaun seluk hodi rezulta pasiente refere mate fatin.
Entretantu observasaun STL nian iha HoREX nota katak, ba asidente refere Komando Polisia Munisipiu Baukau liu husi ekipa Polisia Tranzitu rekolha ona dadus kona-ba asidente refere neebe hetan akompanha husi ekipa task force Polisia Baukau.
Jornalista: Tomas Reis
Editor: Xisto Mendonça
