DILI, STLTIMORLESTE.com – Prezidente Republika (PR), José Ramos Horta hatete, 12 Novembru hanesan loron memoria no omenajen ba foinsae sira neebe ho aten barani hamriik defende liberdade.
Xefe Estadu hatoo kestaun nee liu husi nia diskursu, bainhira partisipa iha eventu loron Masakre Santa Kruz no loron Juventude ba dala 33, iha Santa Kruz, Balide, Dili, Tersa (12/11/2024).
“Ohin ita halibur hamutuk atu selebra Loron Nasional Juventude Timorense, data ida neebe laos deit reprezenta ita nia foinsae sira nia forsa no entusiazmu, maibe mos marka aniversariu ba dala 33 husi eventu ida neebe marka klean ita nia istoria no ita nia povu Masakre Santa Cruz. Ida nee hanesan loron memoria no omenajen ba foinsae sira neebe ho aten barani, hamriik hodi defende ita nia liberdade no dignidade,” dehan PR, Horta.
Tanba tuir Xefe Estadu, iha loron 12 Novembru 1991, joven Timoroan sira sakrifika sira nia aan ba rai doben TL hodi hasoru buat neebe parese imposivel. Ohin, fo onra ba korajen ida nee laos deit ho liafuan, maibe hodi reafirma kompromisu atu fo kbiit no valoriza foinsae sira ohin nian nuudar motor ba transformasaun no hametin identidade Timoroan nian.
“Ita nia rain hasoru dezafiu boot. Mudansa klimatika no integrasaun tomak iha Asosiasaun Nasaun Sudeste Aziátiku (ASEAN) destaka hanesan marku rua iha futuru neebe sei ezije dedikasaun, inovasaun no espíritu reziliente. No presizamente ita-nia foin-sae sira maka sei halao papel sentral iha jornada renovasaun ida-nee,” katak nia.
Horta hatete, Juventude no Mudansa Klimatika Ajente sira Reziliensia no Transformasaun nian Mudansa klimatika reprezenta ameasa ida neebe aumenta ba beibeik, hodi ezije nasaun atu prepara aan hodi hasoru periodu rai maran neebe prolongadu, udan boot, inundasaun no kalamidade natural sira seluk neebe sai frekuente ba beibeik. Iha kontestu ida nee, juventude Timor Leste iha knaar neebe vital atu halao.
Entretantu iha selebrasaun loron Masakre Santa Kruz no juventude ba dala 33 hahu ho misa iha Igreza Motael no remata misa membru Governu ho juventude rezistensia inklui mos povu Marxa husi Igreza Motael ba iha Santa Kruz, hodi kontinua serimonia no ikus tau aifunan ba saudozu Maxtal nia rate nomos kruz boot.
Partisipante neebe mak marka prezensa iha loron importante nee mai husi Prezidente Republika, Jose Ramos Horta, Visi Primeiru Ministru Mariano Assanami Sabino,
Reprezentante prezidente Parlamentu Nasional, Reprezentante Tribunal Rekursu, Eis Prezidente Republika atual Prezidente Partidu FRETILIN ho Espoza, Eis Primeiru Ministru Mari Alkatiri, Tenente Jenera Referal Lere Anan Timur, nomos membru Governu, membru Parlamentu Nasional no juventude rezistensia inklui povu Timor Leste.
(eme)
