DILI, STLTIMORLESTE.com – Prezidente Republika (PR), Jose Ramos Horta apela ba profesores no estudante sira atu investe iha kursu sira para foka ba nesesidade estratejiku iha Timor Leste.
Nia dehan, labele iha fatin ida neebe apropriadu liu atu lansa pedidu ida nee, duke Fakuldade Enjenaria, Siensia no Teknolojia (FECT), tanba iha nee mak bele enkoraja joven sira atu fo prioridade ba kursu tekniku no sientífiku sira, liu-liu iha area sira agrikultura nian, peska no silvikultura.
Maske habelar ona nível oin-oin edukasaun nian ba munisípiu hotu-hotu iha país nee, esensial tebes atu konsidera kualidade servisu edukasional sira neebe oferese no investe iha formasaun adekuada ba profesor sira. Maske iha avansu, observa nafatin taxa aas insusesu eskolar, neebe kontribui ba abandonu eskolar no aumenta difikuldade atu hetan asesu ba ensinu sekundariu no superiror.
“Destaka mos difikuldade sira neebe ita nia sidadaun sira hasoru hodi asesu ba nivel edukasaun oin-oin, dala barak tanba tradisaun kultural ka família nian neebe la justifika ona iha sekulu XXI. Esensial tebes atu ita investe ho forma estratejiku liutan iha ensinu tekniku profisional, formasaun profisional no ensinu superior politekniku, alinadu ho nesesidade empreza sira nian no objetivu dezenvolvimentu nasaun nia,” dehan Xefe Estadu ba jornalista sira, bainhira remata selebrasaun tinan 24 ejistensia UNTL, iha Kampus UNTL Hera, Sesta (15/11/2024).
Xefe Estadu afirma, krusial atu destaka dezafiu foun sira neebe Timor Leste hasoru tantu iha palku global no rejional. PR refere klaru ba mudansa klimatika, neebe fo impaktu diretamente ba nia moris, lori períodu rai maran neebe naruk, udan no anin neebe makaas ba beibeik. Fenomenu sira nee hamosu krize no kalamidade natural sira ho gravidade no konsekuensia sira neebe aumenta.
Oras nee hasoru dezafiu integrasaun tomak iha Asosiasaun Nasaun Sudeste Aziátiku (ASEAN). Iha parte ida, integrasaun ida-nee loke odamatan ba merkadu ida ho ema liu millaun 700, ho Produtu Internu Brutu liu dólar triliaun tolu iha parte seluk, ezije ema kapasidade atu kompete no buras iha ambiente ida livre sirkulasaun ema, sasan no kapital nian, buat ida neebe hahu sente daudaun ona.
Tanba kursu sira neebe foka ba dezenvolvimentu ambiental sustentavel maka esensial atu nunee bele aproveita oportunidade sira husi ekonomia verde no azul no hasoru problema neebe buras daudaun kona-ba asesu ba bee-hemu no tranzisaun enerjetika ba fonte renovavel sira.
(eme)
