DILI, STLTIMORLESTE.com – Comopolitan College Of Commerce & Technology husi Brunei Darusalam hakarak kolabora ho IOB, atu fornese formasaun vokasional profisional iha area espesializada sira, hodi kapasita joven servisu iha rai liur ho skill diak.
Liafuan nee haktuir husi Diretor Ezekutivu Comopolitan College Of Commerce & Technology Husi Brunei Darusalam, Prabhu Sethuratnam ba jornalista sira iha Palasiu Prezidensial Nicolau Lobato, Bairo Pite, Kuarta (05/11/2025).
Nia hatete, sente privilejiu tebes ohin bele hasoru Prezidente Republika, sira mai husi Brunei Darusallam husi Comopolitan College ho intensaun mak hakarak kolabora ho IOB atu fornese formasaun vokasional professional iha area espesializado sira.
“Ohin ami mai hasoru Prezidente i Senhor Prezidente apoiu tebes inisiativa sira nee i nia mos fo hanoin konaba area espesifiku sira balun neebe mak ami bele serbisu hamutuk, i ami mos konvida senhor Prezidente se iha tempu tinan oin Janeiru ka Febreiru kuandu ami hahu ami nia atividade, Prezidente bele sai testamunha ba ami nia atividade nee,” dehan nia.
Diretor Ezekutivu nee dehan, sente motivado tebes bainhira halo enkontru ho Prezidente da Republika, sira mos fiar katak iha oportunidade barak tebes hodi bele kontribui ba jerasaun foun no joventude sira iha Timor Leste, liu liu husi formasaun profesional vokasional neebe mak karakter nomos bele mai ho kualidade tuir kualidade iha ASEAN, Australia, no Nova Zelandia.
Iha fatin hanesan Reitor IOB, Pedro Ximenes hatutan, parte husi IOB koperasaun nee mosu tanba apoiu husi Embaixador Timor iha Brunei Darusalam Embaixador Abel Guteterres hamutuk ho esforsu husi Ministeriu Negosiu Estranjeiru neebe halo.
“Ita nia intensaun mak hakarak loke koperasaun formasaun vokasional hamutuk ho ita nia kolega sira husi Brunei Darusalam, ita hakarak hahu uluk mak ho lian ingles, nunee bele kapasita ita nia joven sira. Sekarik sira hakarak ba serbisu iha liur karik, sira nia abilidade ingles nee diak liu nunee sira bele hetan serbisu diak liu,” dehan Diretor IOB nee.
Reitor nee afirma, segundu mak foka ba area espesifiku sira, nunee joven sira ba karik kategoria skill diak, nee laos skil menus nunee bele hetan rendimentu diak liu kompara ida ho agora.
Nia hatete, agora dadaun iha diskusaun hela planu nee tinan oin Janeiru no Febreiru ho kursu ingles, maibe kursu ida neebe mak hetan sertifikasaun iha nivel ASEAN, nivel Australia ho Nova Zelandia, tanba Brunei nia sistema edukasaun nee sistema Inglatera nian entau sira nia estandarizasaun nee tuir estandar britaniku nia, tanba nee aposta ba kualidade.
Nia hatete, atu hahu nee loke uluk iha Dili maibe sei espander ba munisipiu sira, tanba IOB eziste ona iha Maliana no Baucau.
Nia hatete, formasaun nee laos gratuita, tanba aposta iha kualidade klaru formasaun sira nee sei mai ho kustu kualidade labele mai baratu, maibe ho kustu no tarjetu nee mos ba liu serbisu iha liur no formasaun nee loke ba joven hotu laos deit ba estudante IOB deit.
Iha hasoru malu nee Prezidente Republika Jose Ramos Horta apoiu ideia sira nee, no Prezidente propoin paralende hospitalidade no haree mos area sira neebe ligado hodi kriasaun empregu iha area joventude, emprededorizmu neebe bele kria inisiativa kiik sira atu kria negosiu liu liu ba prodisaun hahan Bebidas, no area kiik sira neebe bele kria lalais empregu hasae valor produtu.
Jornalista: Emerenciana Pinto
Editora: Domingas Gomes
