DILI, STLTIMORLESTE.com – Prezidente Republika (PR), Jose Ramos Horta fo apoiu masimu ba jogu Comunidade dos Países de Língua Portuguesa (CPLP), neebe marka istoria dala ida tan Timor Leste sai uma nain.
Prezidente Republika hatete, ho mundu desportu bele hamorin mos Timor Leste nia naran iha nasional, rejional no internasional, tanba nee Prezidente Repúblika hatete nia fo apoiu masimu, tanba nee iha loron hirak nee Prezidente Republika sempre lao hodi akompanha husi voli praia iha Lecidere mai iha estadiu.
Tuir observasaun neebe mak STL hetan, iha abertura Presidente Republika Jose Ramos Horta la marka prezensa tanba partisipa simeira xefe estadu no xefe governu, maibe bainhira fila husi rai liur mai Presidente Republika sempre lao akompanha jogu CPLP neebe akontese iha rai laran.
Aleinde nee iha loron kuarta (23/07/2025) Prezidente Republika Jose Ramos Horta kontinua akompanha hodi observa direita.
Xefe Estadu hatete, atividade desportivu sira reflete prioridade estratejika prezidente ninia mandatu atu uza desportu nuudar instrumentu promosaun orgulhu nasional no internasional.
Prezidente Republika, Jose Ramos Horta reafirma nia kompromisu ba dezenvolvimentu desportu nasional, hodi marka nia prezensa iha kompetisaun sira iha jogu CPLP, neebe daudaun nee halao hela iha Dili.
Bainhira prezidente lao observa akompanha husi Ministru Juventude, Desportu, Arte no Kultura, Nelio Isaac Sarmento no koordenador jeral jogu CPLP ba dala XII, Jorge Soares Cristovao, xefe estadu haree jogu voli tasi-ibun iha Lecidere, prova husi Taekwondo iha Jinaziu Díli, hanesan mos ho jogu basket ba mane no feto.
Apoiu prezidente la limita deit ba selebra vitoria. Iha momentu difisil hanesan derota seleksaun nasional futebol sub-16 ho resultadu 4-0 hasoru Cabo Verde, Ramos Horta fo korajen ba atleta Timoroan sira.
Entre destake sira iha kompetisaun, Deovia Barreto da Silva manan medalha osan mean iha kategoria feto 46 kg Taekwondo, hafoin final intensa hasoru atleta portugesa, Gabriela Filipa da Silva Mendes. Iha kategoria mane 55kg, Nelio dos Santos Martins hetan medalha osan mutin.
Dezempenhu makaas hosi atleta Timoroan sira iha Taekwondo, hodi kompete ho susesu hasoru adversariu sira neebe iha esperiensia husi Portugal, Angola, no Mosambike, reforsa dezempenhu diak husi programa desportivu sira nasaun nian.
Iha biban nee, Ministru Nelio Isaac hatoo agradesimentu ba prezidente nia apoiu neebe konsistente, no sublina impaktu pozitivu husi prezidente nia prezensa ba atleta Timoroan sira no reprezentante sira husi nasaun sira CPLP nian.
(eme)
