DILI, STLTIMORLESTE.com – Prezidente Republika (PR), Jose Ramos Horta apresia ba kontribuisaun husi veterana Madalena Bidau “Kasian” ba iha area edukasaun iha Munisipiu Likisa.
Prezidente Republika Jose Ramos Horta foin lalais halo vizita ba Eskola Pre Escolar iha Bogoro, Postu Bazartete, Munisípiu Likisa. Eskola refere harii husi Veterana Madalena Bidau Soares, konesidu ho kodigu-naran “Kasian”, hodi haree kondisaun infraestrutura eskola nian no rona direta prekupasaun husi inan veterana nee.
Madalena Bidau Soares “Kasian” mak ex-guerrilheira no veterana rezistensia ida neebe, depois independensia, foka aan ba promosaun edukasaun pre-eskolar no eskola bazika. Nia uza nia benefísiu veteranos nian hodi kontribui ba konstrusaun eskola no mos mobiliza apoiu husi instituisaun Governu no doador sira.
Onan veterana nee konsidera edukasaun hanesan investimentu longu ba futuru labarik sira nian, liu-liu iha area rural sira iha Munisipiu Likisa.
Too agora, inan veterana “Kasian” harii ona eskola lima (5) iha Munisípiu Likisa, mak hanesan Eskola Pre-Primaria Varela Haburas, Bermetha Haburas, eskola rua refere hetan ona rekonesiemntu husi Governu, entretantu eskola Bazika Filial Tesi Bunahan, EBF Nicolau Lobato no EBF Guilermino Gonsalves, seidauk hetan akreditasaun husi Ministeriu Edukasaun tanba estatutu eskola sira seidauk loos. Eskola sira nee inan “Kasian” fo naran ba, foti husi saudozu sira neebe dedika nia vida ba luta libertasaun Rai Timor-Leste, hanesan sinal rekonesimentu ba sakrifísiu jerasaun rezistensia nian.
Tuir Komunikadu neebe STL asesu husi media PR Kuarta (14/01/2026) hatete, durante vizita nee, Prezidente Ramos Horta apresia dedikasaun inan veterana “Kasian” no hatudu prekupasaun ba nia kondisaun saude.
Prezidente hateten, Governu liu husi Ministeriu Edukasaun, fo apoiu ba eskola sira nee hodi halo regularizasaun no kontinuidade servisu edukasaun.
“Nia mak alerta ba Governu, maibe apoia halo eskola nee husi Governu liu husi Ministeriu Edukasaun ho Alokasaun Orsamentu hodi nia naran. Hau kontenti tebes, nee hatudu ama “Kasian” nee uniku. Nia estudu laiha maibe matenek tebes”, hateten Prezidente Ramos Horta.
Prezidente mos hateten katak fo ona instrusaun ba ekipa Prezidensia atu fo fasilidade transporte bainhira inan veterana “Kasian” presiza ba Dili, liu-liu halo tratamentu ba nia saude. Tanba agora enfrenta moras oin-oin, inklui problema kardiovaskular konforme nia (Kasian) hateten no presiza kontinua akompanamentu mediku.
Atualmente, Pre-Escolar no Escola Basica iha Bogoro, Bazartete, estudante hamutuk nain-89 neebe halao hela prosesu aprendizajen loron-loron. Maski inan veterana “Kasian” foin lalais hetan internamentu iha Hospital Nasional Guido Valadares (HNGV) iha fulan Dezembru 2025 tanba problema saude, maibe nia kontinua halo esforsu atu tau matan ba eskola sira neebe nia harii.
Durante vizita iha Bazartete, Prezidente Ramos-Horta hamutuk ho ekipa Prezidensia fahe vitamina ba estudante no profesor sira neebe hanorin iha eskola refere. Entretantu material pasta eskola no kadernu ba labarik estudante sira, apoiu mai husi empresa lokal timoroan “Bandido Qualidade”.
Vizita Prezidente nee konsidera hanesan sinal rekonesimentu Estadu nian ba kontribuisaun veteranu sira nian, liuliu inan feto veterana sira, neebe kontinua fo kontribuisaun konkretu ba dezenvolvimentu komunidade no formasaun jerasaun foun iha Timor Leste.
(eme)
