DILI, STLTIMORLESTE.com – Prezidente Republika (PR), Jose Ramos Horta hatete, viajen ba iha Soe hodi komemora nia aniversariu, nee ninia direitu, tanba lao ho kareta privadu no osan rasik.
Liafuan nee Prezidente Republika Jose Ramos Horta hatoo ba Jornalista iha Palasiu Prezidensial Nicolau Lobato, Bairo Pite, Segunda (29/12/2025).
Nia hatete, nia preokupa ema neebe halo protesta ba nia viajen ba Soe- Indonezia, tanba ba ho kareta privadu no laiha perdiam.
“Hau laliga ba ida nee hau la responde ba ida nee, hau ba halo tinan amigo lubuk ida iha neeba konvida hau para bá halo iha Soe hau ba. Natal hau iha Timor iha 24 Dezembru hau ba Katedral nee importante nasional, agora halo tinan hau bele halo iha Dili- Soe ou iha Nova Yorke nee hau nia direitu. hau nia desizaun laos buatomak media sosial mak deside hau halo iha nee,” katak Horta.
Xefe Estadu dehan, nia komemora aniversariu deside halo iha Soe, tanba besik no hametin liu tan relasaun, no artista barak mos mai partisipa hotu, tanba nee ema ruma iha Timor la kontente tanba sira hakarak haree Prezidente iha Timor karik.
“Tinan oin mai hau nia tinan halo iha Nova Yorke ka Tokyo ka fatin seluk nee hau nia desizaun. Lalori kareta ofisial laiha ema ida ke hetan perdiam seguransa mos lahetan perdiam hau mos ba ho kareta pesoal hau lalori kareta kiik tanba la augenta maibe ho kareta neebe impresta husi ema nia,” katak PR Horta.
Nunee mos Xefe Kaza Sivil Prezidensia Republika, Jesuina Maria Ferreira Gomes hatete, Prezidente viajen ba Soe la uza kareta Prezidente Republika no la uza osan estadu, maibe uza osan privadu.
Viajen Prezidente ba Soe hetan kritika makaas iha publiku, hatan ba kestaun nee Xefe Kaza Sivíl hatete, viajen nee Prezidente fo orden katak 100% privadu.
Prezidente ba ho kareta privadu, ense mina rasik la uza estadu nia osan.
“Ami sira akompanha nee mos ami ba ho kareta privadu, ami uza ami nia osan rasik la uza osan prezidensia nia ba iha viajen nee. Depois prezidente mos foti hela lisensa iha loron hirak nee.
Jornalista: Emerenciana Pinto
Editora: Domingas Gomes
