DILI, STLTIMORLESTE.com – Prezidente Republika (PR), Jose Ramos Horta hatete, nia ba Vietnam tanba konvite husi ASEAN nomos Governu Vietnam, hodi partisipa Forum Futuru ASEAN.
Prezidente Republika, Jose Ramos Horta hatoo lia hirak nee ba jornalista sira, bainhira remata partisipa Forum Futuru ASEAN 2025 fila hikas mai Timor Leste, iha Aeroportu Internasional Nicolao Lobato, Komoro, Dili, Kinta (27/02/2025).
“Hau ba Vietnam ita boot sira hatene hau sai husi nee Segunda, konvite mai husi ASEAN ho Governu Vietnam hodi partisipa iha Forum Futuru ASEAN nian, neebe iha partisipasaun Primeiru Ministru Vietnam membru Governu lubuk ida no mos Sekretariu Jeral ASEAN, Primeiru Ministru Malazia nian neebe Prezidente ba ASEAN tinan ida nee, konvidadu Primeiru Ministru Nova Zelandia ho entidade lubuk ida tan,” katak PR Horta.
Prezidente Republika dehan, iha Vietnam enkontru ofisial bilateral ho Primeiru Ministru, Prezidensia Governu Vietnam nia.
“Espera katak Primeiru Ministru ita nian, Governu bele haree akordu konkretu ruma rai rua nee bele asina, bele implementa. Vietnam nia ekonomia forte tebes-tebes iha mundu 7% kreximentu tinan sira nia laran, rai barak iha mundu enfrenta krize ekonomiku mas Vietnam forte nafatin. Sira simpatia makaas ba Timor Leste iha teknolojia agrikultura bele hatete numeru ida iha mundu entermus produtividade. Ita nian 3 tonelada, diak ona ba pur hektare, Vietname nian 12, 14 tonelada, laos deit foos, hahan oin-oin,” katak nia.
Nunee mos Teknolojia Dijitalizasaun Intelijensia Arti Fisial sira mos top iha mundu, hatene Telemor iha nee mak avansadu liu fali,” katak nia.
Nia hatutan, kabu sub-marinu mos besik konklui ona, entaun Timor bele haksoit ba 5G. “Nee hau sei entrega ba Governu, Governu mak tenke prepara didiak bainhira Primeiru Ministru Vietnam mai atu asina akordu buat neebe konkretu atu rai rua nee implementa iha area oin-oin. Hasoru malu mos ho Primeiru Ministru Nova Zelandia, konvida nia atu mai, nia hatete nia hakarak mai tanba kleur ona Primeiru Ministru Nova Zelandia la mai iha Timor Leste, ida nee nia hatete, nia kompromete aan sei mai. Hasoru mos Sekretariu Jeral ASEAN, hasoru mos Primeiru Ministru Malazia, buat hotu-hotu prontu atu Timor tama ASEAN fulan Maiu iha Simeira ida, iha Simeira nee mak sira bele halo desizaun ofisial, formal definitivu. Maibe Primeiru Ministru Malazia hatete ba hau, sira haree Simeira Outubru ka Novembru konforme marka mak Timor tama,” katak Xefe Estadu.
Sira halo desizaun unanimi Simeira iha Maiu nee depois serimonia adezaun bele akontese iha Simeira Outubru ka Novembru. Nee mak viajen rezultadu konkretu ba vizita Vietnam.
(eme)
