DILI, STLTIMORLESTE.com – Prezidente Republika (PR), José Ramos Horta hatete, Bangladesh hakarak halo relasaun komersial ho Timor Leste (TL).
Prezidente Republika José Ramos hatoo lia hirak nee ba jornalista sira, bainhira remata halo vizita Estadu ba Bangladesh no fila hikas mai Timor Leste iha Aeroportu Internasional Nicolao Lobato Komoro, Kuarta (18/12/2024).
Prezidente Republika hatete, nia vizita ba Bangladesh, tanba Primeiru Ministru Interinu Profesor Muhammad Yunus mak konvida.
“Hau ba Bangladesh dala tolu ona iha tinan sira nia laran, maibe primeira vez mak ba hanesan ofisial. Ita relasaun ladun ho Bangladesh, maibe relasaun liu-liu mak ho India. India loke ona Embaixada iha nee, ita loke daudaun embaixada iha India, maibe Bangladesh mos importante ba ita, 174 milhões pesoas. Sira hakarak aumenta relasaun komersial relasaun teknika ho Timor Leste iha area oin-oin,” katak Horta.
PR Horta hatete, iha area balun sira susesu boot, porezemplu, maske rai nee kiik no iha difikuldade los, tanba populasaun barak rai kiik maibe sira konsege hatun estrema pobreza menus 30%.
Nunee mos iha ona estudante Timoroan balun iha neeba, sira ba privadu sira nain 10, balun estuda medika, enfermajen no seluk tan.
“Politikamente diplomatika relasaun bele metin los ho Bangladesh. Hau konhese Primeiru Ministru Interinu figura mundial konhesidu Premiadu Nobel da Pas iha 2006, aleinde Premiadu Nobel da Pas, nia mos simu kongresu media lovour,” tenik Horta.
Nia dehan, PM Interinu Bangladesh ema ida konhesidu tebes, nia mai Timor dala tolu ona nuudar Premiadu Nobel da Pas, PR Horta mak konvida nia.
(eme)
