DILI, STLTIMORLESTE.com – Prezidente Republika (PR), Jose Ramos Horta ho Primeiru Ministru Malazia, Dato Seri Anwar Ibrahim iha konkordansia hametin kooperasaun bilateral rai rua iha futuru.
Bainhira remata halo enkontru Prezidente Republika, Jose Ramos Horta liu husi konferensia imprensa, iha Palasiu Prezidensial, Nicolau Lobato, Bairru Pite, Tersa (23/09/2024) hatete, iha enkontru nee konkorda atu hametin liutan kooperasaun bilateral ba povu rua nia benefísiu.
Iha biban nee Prezidente Republika hatoo ksolok boot fo benvindu ba nia belun diak, Onoravel Dato Seri Anwar Ibrahim, Primeiru-Ministru Malazia nian, iha ninia vizita ofisial mai Timor-Leste.
Prezidente Republika sublima, Primeiru Ministru nia vizita nee nuudar prova ida ba amizade neebe klean no metin entre nasaun rua, amizade ida neebe harii iha solidaridade no hametin liu husi kompromisu komun ba demokrasia, justisa, no pas. Malazia hamutuk TL durante momentu krítiku sira iha istoria, no apoiu metin ida-nee mak buat ida neebe, povu Timor-Leste, nunka atu haluha.
“Ami-nia diskusaun ohin lao ho diak, konstrutivu, no foka ba futuru. Hanesan ita prepara-an ba ita-nia adezaun istorika ba ASEAN iha Outubru oin mai iha Kuala Lumpur, Malazia nia parseria importante tebes. Ami komprometidu atu serbisu besik liutan ho Malazia no membru ASEAN sira hotu atu kumpre kriteriu sira neebe sei falta iha ami-nia dalan atu sai membru plenu. Ami mos konkorda atu hametin liutan ita-nia kooperasaun bilateral ba ita-nia povu rua nia benefísiu. Ami sei enkoraja investimentu boot liutan husi Malazia iha ami-nia setor xave sira hanesan agronegosiu, turizmu, no enerjia renovavel. Ami sei hakarak liutan oportunidade ba ami-nia foin-sae sira liuhusi edukasaun no formasaun vokasional iha Malazia. No ami sei serbisu atu hadia konektividade entre ita-nia nasaun rua, hodi fasilita viajen no komersiu,” dehan PR, Horta.
Xefe Estadu iha kuarta rona Primeiru-Ministru nia hanoin matenek bainhira nia hatoo ninia palestra ba nasaun iha Seri Palestra Prezidensial 2025 ba dala-IV ho tema “ASEAN no Papel Timor-Leste nian.
“Sei sai onra boot ida ba hau atu kondekora Primeiru-Ministru Dato Seri Anwar Ibrahim ho Grande Colar da Ordem de Timor-Leste, ami-nia nasaun nia onra aas liu. Kondekorasaun ida-nee nuudar rekoñesimentu ba ninia advokasia pesoal no kleur ona ba ami-nia kauza, no ba Malazia nia papel xave, iha ninia lideransa nia okos, hodi apoia ami-nia dezenvolvimentu nasional no ami-nia jornada atu sai membru ASEAN ba dala-11,” hatete PR, Horta.
Timor-Leste no Malazia laos deit nasaun vizinu maibe parseiru iha konstrusaun Sudeste Aziatiku ida neebe dame, prosperu, no integradu
Prezidente Republika fiar metin katak vizita ida-nee sei loke kapítulu foun ida neebe importante tebes iha relasaun Timor Leste ho Malazia.
Nunee mos Primeiru-Ministru, Datuk Seri Anwar Ibrahim espressa sentimentu kontente durante resepsaun formal ida iha Palasiu Prezidensial ohin kalan, hodi marka inísiu sesaun ofisial ba loron da-huluk ninia vizita istoriku durante loron rua mai Timor-Leste.
Assembleia neebe prezide hosi Prezidente Jose Ramos-Horta iha tuku 4:10 p.m. oras lokal, hahu ho toka hino nasional sira hosi nasaun rua nee, tuir fali ho tiru dala-19.
Primeiru Ministru Anwar mos halo inspesaun ba guarda onra nian no asina Livru Konvidadu nian molok hasoru-malu ho Ramos-Horta no enkontru.
Primeiru Ministru Anwar akompañadu hosi Ministru Defeza Malazia nian, Datuk Seri Mohamed Khaled Nordin, Ministru Komunikasaun, Datuk Fahmi Fadzil, no Prezidente Sekretariadu Ministeriu Negosiu Estranjeiru, Datuk Seri Amran Mohamed Zin.
Iha biban nee Prezidente Ramos-Horta akompana husi Primeiru-Ministru (PM), Kay Rala Xanana Gusmão, Vise-Primeiru-Ministru, Ministru Koordenador Asuntus Ekonomikus no Ministru Turizmu no Ambiente, Francisco Kalbuadi Lay, Ministru Negosius Estranjeirus no Kooperasaun, Bendito dos Santos Freitas no membru Governu sira.
Jornalista: Emerenciana Pinto
Editora: Carme Ximenes
