DILI, STLTIMORLESTE.com – Prezidente Republika (PR), Jose Ramos Horta destaka pas no rekonsiliasaun entre Timor Leste (TL) ho Republika Indonezia (RI) durante vizita ba nasaun Bulgaria.
Husi Prezidente Republika, Jose Ramos Horta hatoo palestra ida neebe importante iha Institutu Ministeriu Negosiu Estranjeiru Bulgária nian, hodi sublina Timor Leste nia viajen notavel ba pas no rekonsiliasaun.
Bainhira koalia ba audiensia husi embaixador no diplomata sira, Ramos Horta sublina Timor Leste nia realizasaun durante tinan 23 hodi mantein demokrasia la ho violensia etnika ka relijioza, hodi nota progresu signifikativu dezde independrnsia iha tinan 2002 – inklui aumentu husi pessoal mediku nain 20 deit ba liu rihun ida, habelar asesu eletrisidade iha nasaun tomak, no aumenta hosi universidade ida ba universidade liu sanulu.
Prezidente destaka kompromisu Timor Leste nian ba rekonsiliasaun dukue vingansa, partikularmente ninia relasaun hakmatek ho Indonezia, neebe diplomata europeu sira haree hanesan surpreza no admiravel tanba konflitu rejional sira neebe lao hela hanesan Ukránia-Rúsia.
Prezidente liu husi komunikasi neebe STL asesu Kinta nee (24/04/2025) hatete, esforsu rekonsiliasaun nasional, liu-liu ho Indonezia, sai instrumental hodi garante pas iha nasaun tomak. Durante ninia aprezentasaun, Xefe Estadu aborda mos dezafiu internasional sira neebe boot liu inklui konflitu sira iha Gaza.
Prezidente Ramos Horta espresa satisfasaun katak maski Timor Leste nuudar nasaun kiik no lao hela iha dezenvolvimentu, ninia ezemplu pozitivu rezoan ho nasaun europeu sira, kulmina iha planu kooperasaun bilateral ho Bulgaria hodi harii hamutuk ba futuru.
(eme)
