DILI, STLTIMORLESTE.com – Prezidente Republika (PR), Jose Ramos Horta hatete, dezenvolvimentu ekonomiku nee papel importante husi forsa trabalhu hodi forma Timor Leste nia futuru.
Prezidente Republika hatete, iha signifikativu loron Mundial Traballador sira nian, ita fo onra no selebra espíritu, reziliensia, determinasaun no kontribuisaun husi trabalhador sira nasaun doben no iha mundu tomak.
“Bainhira ita marka loron importante ida nee iha tinan 2025, ita refleta kona-ba ita nia viajen ba harii nasaun, dezenvolvimentu ekonomiku, no papel importante husi ita nia forsa trabalhu hodi forma Timor Leste nia futuru. Ita nia jornada dezde independensia marka ho aten barani neebe estraordinariu,” dehan PR Horta liu husi mensajen iha Palasiu Prezidensial, Sesta (02/05/2025).
Prezidente Republika dehan, servisu nain sira iha Timor Leste laos deit harii fila fali ekonomia, maibe sai ona arkitetu ba reziliensia nasional. Hahu husi trabalhador agríkola iha komunidade rural sira too profisional sira iha sentru urbanu neebe buras daudaun, trabalhador idak-idak kontribui ba konstrusaun progresu nasional.
“Tinan ida nee ita sublina importansia hodi promove Justisa Sosial no servisu dignu ba trabalhador hotu iha Timor Leste. Ita nia misaun mak atu kria armonizasaun ba kondisaun servisu neebe seguru, saudavel no protejidu neebe kontribui ba kresimentu ekonomiku husi ita nia nasaun,” katak PR Horta.
Xefe Estadu hatete, sidadaun idak-idak merese hetan dignidade iha sira nia servisu no rekonesimentu justu ba sira nia kontribuisaun.
Liman neebe servisu, hanoin neebe mehi no fuan neebe persiste sira nee mak fundasaun loloos husi nasaun. “Ita-nia trabalhador sira laos deit servisu nain, maibe personifikasaun moris husi korajen no potensial Timor Leste nian,” dehan Horta.
Nia dehan, trabalhador idak-idak neebe hadeer dadeer dadeer hodi konstrui, kria no lori nasaun ba oin, servisu mak pulsa husi espíritu nasional.
“Bainhira ita kontinua harii ita nia demokrasia joven, mai ita hanoin katak Forsa Timor Leste nian rezide husi ninia forsa trabalhador sira. Hamutuk, ita sei kria futuru ida iha neebe traballador hotu hetan respeitu, protesaun, no valoriza ba sira nia kontribuisaun esensial mai ita-nia sosiedade,” katak nia.
Prezidente Republika dezeju ba trabalhador sira hotu neebe haksolok, nakonu ho dame no alegria, no hein katak tinan oin mai sei lori mai ita prosperidade no progresu barak liu tan.
(eme)
