DILI, STLTIMORLESTE.com – Prezidente Republika (PR), Jose Ramos Horta hatete, durante nia viajen estadu ba nasaun oin-oin lobi investor atu halo investimentu iha Timor Leste (TL), maibe Governu mak la halo lei protesaun ba investor, tanba nee investor sira la mai.
Prezidente Republika hatoo kestaun nee liu husi nia diskursu bainhira partisipa eventu organiza Premiu Feto Emprendedora Timor Leste 2024 iha salaun Multi Uzu Bebora, Tersa
(19/11/2024).
Prezidente hatete, investor barak hakarak halo investimentu iha TL, maibe sira husu presiza iha lei ruma hodi garante ba investor, maibe too agora Governu seidauk halo. Ho ida nee mak investor sira too agora seidauk bele mai halo investimentu iha TL.
“Hau koalia ho amigu sira iha Abu Dhabi, iha hau nia vizita para buka investimentu husi Abu Dhabi sira hatete, ami hein deit buat 2, dokumentus 2 husi TL mak lei kona-ba protesaun investimentu, i eliminasaun kualker double takses nee sira husu sira la husu buat seluk, sira hatete imi halo lei rua nee ami ba kedas. Hau koalia ho autoridade hotu-hotu iha nee hau lakohi temi naran, maibe sira hotu neebe iha autoridade iha rai nee hau koalia hotu sira sira hotu konkorda ho lei rua nee tinan 1 resin ona,” dehan Horta.
Nia hatutan, iha Outubru 2023 Prezidente Republika halo vizita ofisial ba Abu Dhabi no antes viajen PR husu halo ona lei rua nee, mais la halo too agora.
(eme)
