DILI, STLTIMORLESTE.com – Prezidente Republika (PR), Jose Ramos Horta hatete, ema neebe kestiona Prezidente Republika fo pose ba Juiz Afonso Carmona asumi kargu nuudar Prezidente Tribunal Rekursu (PTR) laos publiku maibe ida rua deit.
Prezidente Republika Jose Ramos Horta hatoo kestaun nee ba jornalista sira iha Timor Plaza, Sabadu nee (03/05/2025) hatete, laos publiku mak kestiona kona-ba pose ba Juiz Afonso asumi kargu nuudar Prezidente Tribunal Rekursu maibe ema ida rua mak halo protesta.
“Nee laos publiku maibe buatomak ida no buatinak ida mak koalia, agora dehan publiku nee lae maibe ema balun ke sira hakarak kontrola, tanba nee hanesan sira nia kultura politika kultura ideolozia dezde 1975 lakon eleisaun prezidensial, lakon parlamentar hakarak domina nafatin setor judisiaria hau laiha partidu, hau tuir deit konsiensia hau nia, hau tuir deit konstituisaun no hau nein fiar ba estadu ida nee tenke hamate tiha partidarizasaun iha setor judisiariu,” dehan PR Horta.
Haree iha neeba se mak iha elementus partidu nia, entau publiku ida ema nain rua nain tolu nee mak la kontente.
“Hau sei fo resposta, hau hein hela iha tempu propriu sei halo resposta kompletu relasiona ho pose ba Prezidente Tribunal Rekursu husi parte Tribunal mos halo ona mandadu sitasaun ba Prezidente oinsa Prezidente nia resposta ba ida nee, hatan ba kestaun nee Prezidente Republika hatete, oras nee daudaun Prezidensia Republika prepara hela resposta.
“Nee hau la komenta, agora tanba Prezidensia prepara hela resposta, nee mak balun sei hakfodak sira halo komentariu opinaun la tuir estudu didiak dokumentasaun neebe iha ba hau situasaun klaru los nee iha hau nia mandatu konstitusional, tuir presedente iha ita nia sistema juridiku portugues nia para nomeia Prezidente Tribunal Rekursu,
Prezidente Republika hatete nia hakarak aselera kriasaun tribunal supremu para hamate tiha problema partidarizasaun politizasaun ke barak los iha sistema judisiariu liu-liu iha Tribunal Rekursu para labele partidu ida ho sira nia elementu domina iha tribunal nia laran.
(eme)
