DILI, STLTIMORLESTE.com – Prezidente Republika (PR), Jose Ramos Horta entrega kolar Ordem Timor Leste neebe aas ba Eis Embaixador Portugal, iha Timor Leste (TL).
Tuir Komunikadu neebe mak STL asesu husi media Prezidensia Republika, Domingu (27/10/2024) hatete, Prezidente Republika, Jose Ramos Horta entrega Kolar Ordem Timor Leste nian, onra aas liu nasaun nian, ba eis Embaixador portuges sira Pedro Luís Baptista Moitinho de Almeida no João Nunget Ramos Pinto iha serimonia ida neebe halao iha Ótel Palacio iha Cascais.
Kondekorasaun neebe estabelese husi Dekretu Prezidensial Nú. 109/2024 iha loron 15 Outubru, rekoinese meritu no dedikasaun estraordinariu hosi embaixador nain rua durante halao knaar nuudar xefe ba Misaun Diplomatika Portugal iha Díli. Sira nia esforsu sai instrumental hodi hametin relasaun bilateral sira no promove amizade entre nasaun rua nee.
Ordem Timor Leste nian, neebe kria husi Dekretu-Lei No. 20/2009, rekohnese indivídu sira neebe presta ona servisu signifikativu ba nasaun ka umanidade liu husi promove pas, estabilidade, no progresu iha Timor Leste.
Serimonia nee halao durante vizita serbisu privadu Prezidente Republika, Ramos Horta nian ba Portugal iha loron 22 too 29 Outubru 2024.
Iha biban nee, Xefe Estadu hatete, kolar nee hodi hatoo omenajen ba rekonhesementu neebe embaixador nain rua halo hodi promove relasaun fraternu entre Timor Leste no Portugal, ho sira nia lideransa hametin diplomasia no lori benefisiu ba povu Timor Leste.
“Omenajen nee espresa ami nia rekonhesimentu ba knaar esensial neebe embaixador nain rua halao hodi promove relasaun fraternu sira entre Timor Leste ho Portugal. Sira nia dedikasaun no lideransa hametin ona ita nia diplomasia no lori benefísiu konkretu ba povu timoroan”, katak PR Horta iha serimonia neebe partisipa husi dignitariu sira husi nasaun rua nee.
(eme)
