DILI, STLTIMORLESTE.com – Prezidente Republika (PR), Jose Ramos Horta hatete, ho estabelesimentu Embaixada Angola iha Timor Leste sei hasae involvimentu diplomatiku entre Timor Leste ho Angola.
Prezidente Republika Jose Ramos Horta hatete, ho estabelesimentu Embaixada Angola iha Timor Leste marka pasu signifikativu ida iha relasaun diplomatika entre Timor Leste ho Angola. No sai mos hanesan plataforma vital ida hodi hasae kooperasaun.
Prezidente Republika, Jose Ramos Horta hatoo kestaun nee liu husi nia diskursu bainhira partisipa inaugurasaun ba embaixada foun Angola nian iha Díli, Tersa (06/05/2025).
“Hodi marka signifikativu iha relasaun diplomatika entre Timor Leste no Angola. Estabelesimentu misaun ida nee sublina fortalesimentu prezensa diplomatika Angola nian iha Timor Leste, harii iha ligasaun istorika neebe fahe entre nasaun luzofonu rua nee,” katak PR Horta.
Prezidente Ramos Horta sublina katak, estabelesimentu Embaixada Angola nian nee sei sai hanesan plataforma vital ida hodi hasae envolvimentu diplomatiku, promove interkambiu kultural no impulsiona kooperasaun ekonomika.
Nia nota importansia husi kolaborasaun iha area sira hanesan agrikultura, edukasaun no enerjia, neebe mak krusial ba dezenvolvimentu sustentavel no prosperidade ba povu nasaun rua nee.
Iha biban nee Embaixador Angola ba Timor Leste, Jose Andrade de Lemos reafirma Angola nia kompromisu hodi apoia viajen dezenvolvimentu Timor Leste nian.
Embaixador destaka Angola nia prontidaun atu fahe esperiensia sira neebe iha valor iha rekonstrusaun pos-konflitu no diversifikasaun ekonomika.
Embaixador mos salienta katak, embaixada sei sai instrumental hodi haburas diplomasia kultural no hametin ligasaun ema ho ema neebe esensial ba parseria neebe dura.
Inaugurasaun Embaixada Angola nian iha Dili simboliza kapítulu foun ida iha relasaun bilateral, neebe reflete nasaun rua nia dedikasaun atu harii ekonomia reziliente no ligasaun neebe besik liu tan.
Marka diplomatiku ida nee hein atu loke dalan ba interkambiu no kooperasaun neebe mak fo fuan, hodi fo benefísiu ba Angola no Timor Leste iha tinan sira tuir mai.
Serimonia inagurasaun Embaixada Angola iha Dili marka prezensa husi Prezidente Republika Jose Ramos Horta, Ministru Negosiu Entranjeiru no Koperasaun, Visi Primeiru Ministru Kalbuady Lay, Deputadu Maria Terezinha Viegas, reprezenta PPN, Prezidente Tribunal Rekursu Afonso Carmona, membru Governu, Membru Parlamentu Nasional, Korpu Diplomatiku, Major General Falur Rate Laek, nomos Osvaldo dos Santos Varela, Sekretario de Estado para a Administração, Finanças e Património do Ministério das Relações Exteriores da República de Angola, Embaixador Angola ba Timor Leste José Andrade de Lemos nomos reprezentantes Afiliações Religiosas, repzentante Ajensia Dezenvolvimentu Internasionais, Sosiedade Sivil, Setor Privadu, Akademia no seluk tan.
(eme)
