DILI, STLTIMORLESTE.com – Prezidente Republika (PR), Jose Ramos Horta hatete, Estadu Timor Leste tau matan ba veteranu sira no sira simu apoiu oin-oin.
Prezidente Republika, Jose Ramos Horta hatoo lia hirak nee ba jornalista sira, wainhira fila hikas husi Vietnam iha Aeroportou Internasional Nicolau Lobato, Komoro, Kinta (27/02/2025).
Selebra loron Nasional Veteranu maibe oinsa Prezidente haree ba veteranus sira nia moris agora, hatan ba kestaun nee Prezidente Republika hatete, nia hatete ba rai barak katak Estadu tau matan ba veteranu sira.
“Rai ida nee, Estadu ida nee tau matan ba veteranu sira, iha mundu neebe hau konhese laiha. Rai barak tau matan ba veteranu hanesan Timor. Veteranu sira simu apoiu oin-oin bele haree numeru konkretu, osan hira mak ba veteranu sira, mais US$ 1 bilhaun, hahu iha 2008 mais US$ 1 bilhaun, numeru nee too Dezembru 2021 mak U$$ 1 bilhaun sentu ital milhoens. Bele husu ba Ministru Asuntu Kombatentes Libertasaun Nasional, nia bele atualiza iha 2025 osan hira ona. Sira merese, veteranu sira fó sira nia kosar, sira nia raan, sira nia vida, maibe tenke haree ho kakutak intelejensia diak liu oinsa apoiu sira nee bele sai sustentavel ba sira rasik,” dehan PR Horta.
Prezidente Republika hatutan, too agora seidauk iha hanesan programa ruma veteranu sira simu osan, simu apoiu mas depois laiha buat seluk neebe sira ho sira nia família bele halo, unidade bele halo nunee sira nia vida sai duni diak liu.
Veteranus sira merese duni ka lae? Governu tau matan ba saude veteranus sira, hatan ba kestaun nee PR Horta dehan, ida nee nia husik ba Primeiru Ministru tanba nia mak veteranus numeru ida.
“Hau husik ba Primeiru Ministru, nia mak veteranu numeru ida iha rai nee, nia mak hatene liu, nia mak ita bele hatete eroi numeru ida iha rai nee. Nee duni bainhira ita koalia kona-ba veteranu hau tuir deit, hau rona maun boot Primeiru Ministru Xanana, nia mak iha autoridade, iha konhesimentu polítiku tekniku no autoridade nuudar Primeiru Ministru atu haree asuntu nee, buat neebe nia hanoin, nia halo, hau apoiu 100%,” katak nia.
Nunee oinsa Prezidente Republika, Jose Ramos Horta nuudar Komandante Supremu nia haree kona-ba bala musan neebe kontinua espalha, tuir Komandante Supremu nia haree saida mak ministeriu relevante halo? Hatan ba kestaun nee Prezidente Republika hatete, ida nee nia la hatene buat ida.
Primeiru komandante supremu laos komandante ezekutivu ba forsa armada, Primeiru Ministru, Ministeriu Defeza, Xefe Estadu Maioria, Jeneral Forsa Armada, sira mak tenke haree buat sira neebe administrativu, operasional disiplina jestaun forsa armada nian.
“Hau hanesan deit bele konsidera amu Cardeal ida ba forsa armada, nee hau laiha liu intervensaun operasional ruma, autoridade ruma,” hakotu nia.
(eme)
