DILI, STLTIMORLESTE.com – Prezidente Republika (PR), Jose Ramos Horta hatete, Eurico Guterres agora daudaun nasionalidade Indonezia, maibe nia (Eurico-Red) iha direitu mai Timor Leste (TL), tanba nia mos ema Timoroan.
“Se mak koalia fali Eurico Guterres, Eurico Timorense, embora nia agora nasionalidade Indonezia, Indonezia la autoriza dupla nasionalidade. Maibe ba Timor nia sempre iha direitu atu mai Timor, dezde laiha lei ruma atu krende nia, nee mak hau nia preokupasaun, tanba ita nia rekonsialiasaun Timor nee hipokrazia barak, rekonsialiasaun deit ho jeneral sira ho Indonezia, maibe ho pro-otonomia lae,” dehan Prezidente Republika ba jornalista sira, bainhira remata halao abertura ba seminariu Internasional neebe mak realiza husi PDHJ, iha Salaun Novu Turismu, Kuarta (20/11/2024).
Xefe Estadu dehan, koalia makaas kona-ba justisa maibe FRETILIN rasik mak tenke responde ba justisa, família sobrevivente, vitíma FRETILIN nian lubuk ida mai koalia ho PR, sira hatete Sarjento Aquilis nia família, Avo Xaver nia família lubuk ida, tanba nee mak diak liu taka deit prosesu nee, lalika koalia hela deit, temi aat pro-otonomia sira.
“Tanba nee Governu Indonezia rona, no haree afinal Timor nee sinseru ka la sinseru bainhira koalia kona-ba rekonsialiasaun,” katak Xefe Estadu.
Prezidente Republika mos husu Deputadu no Deputada iha uma fukun Parlamentu Nasional diak liu foka ba atividade partidu nian, nunee eleisaun mai labele lakon.
“Hau hatete ba FRETILIN, diak liu konsentra ba imi nia organizasaun, FRETILIN nee hahu 2002 kada eleisaun mai lakon, tun uluk 57 kadeira, agora 19 deit, tanba líder sira nia hahalok rasik, tanba deputadu sira nia hahalok. Sira koalia radikalizmu 1975 iha Parlamentu Nasional nee povu la haree ga, povu barak ona rona sira hakilar, ema la liga liu,” katak PR, Horta.
(eme)
