DILI, STLTIMORLESTE.com – Prezidente Republika (PR), Jose Ramos Horta ezije zero toleransia ba krime Violensia Domestika (VD) hasoru ema vulneravel sira no husu aumenta atensaun ba krime rodaviariu.
Prezidente Republika Jose Ramos Horta hatoo lia hirak nee liu husi nia mensajen iha Palasiu Prezidensial Nicolau Lobato, Bairo Pite, Sesta (27/03/2026).
“Ami ezije toleransia zero ba krime violensia domestika ka violensia hasoru ema vulneravel sira. Ami husu atu aumenta atensaun hasoru krime rodoviariu sira no lori karreta ho influensia alkol nian. Atensaun ida neebe permanente neebe orienta husi PNTL nia lema Servi no Proteje, neebe deklaradu ho bensan husi Santu Antonio, nia padroeiru, dezde ninia kriasaun iha loron 27 fulan-marsu tinan 2000, iha UNTAET nia okos, neebe ita selebra ohin loron,” dehan Prezidente Republika.
Iha biban nee Preziente Republika hatete Formasaun, Meritu no Dezenvolvimentu Institusional, Forsa polísia ida neebe moderna, efikas no respeitadu harii iha meritu, dixiplina, sentidu misaun nian no investimentu permanente iha kualifikasaun ba ninia rekursu umanu sira.
“Maibe seguransa laos responsabilidade mesak PNTL nian. Seguransa nuudar responsabilidade hamutuk neebe tenke envolve ema hotu sidadaun sira, família sira, eskola sira, empreza sira, líder komunitariu sira, autoridade lokal no nasional sira, no mos organizasaun sosiedade sivíl sira. Iha espíritu polísia komunitaria nian, importante atu hametin parseria ida-nee kona-ba konfiansa, prosimidade no koresponsabilidade, hodi rekonese katak prevensaun kriminalidade, protesaun ba ema no propriedade, no prezervasaun ba pas sosial ezije laos deit kumprimentu ba lei no respeitu ba autoridade lejítima, maibe mos vijilansia sívika, partisipasaun ativa no kolaborasaun permanente entre polísia no populasaun,” dehan PR Horta.
Alende nee Xefe Estadu hatutan tan katak Juventude no Partisipasaun Sívika “Nunee, hau enkoraja ita-nia foin-sae sira atu envolve-an ativamente iha konstrusaun sosiedade ida neebe segura, ordenada no prosperu, tantu liu hosi apoiu servisu publiku no asaun polisiamentu komunitariu (Ofisial Polísia Suco), ka liuhosi sira-nia partisipasaun iha inisiativa sensibilizasaun no kampana seguransa publika. Foin-sae sira neebe formadu ho diak, konxiente kona-ba sira-nia direitu no responsabilidade sira, fortalese sidadania ativa no kontribui ba sosiedade ida neebe estavel liu, justu liu no pasífiku liu,” katak Horta.
Alende nee Feto iha Polísia no iha Sosiedade No, bainhira koalia kona-ba partisipasaun sívika, responsabilidade koletiva no harii sosiedade ida neebe segura, justa no ekilibrada liu, importante hanesan atu rekonese feto sira-nia papel indispensavel, tantu iha PNTL nia laran no mos iha vida nasional tomak.
“Nunee ita tenke kontinua implementa medida konkreta sira ba empoderamentu feto nian, hodi garante oportunidade hanesan iha asesu ba formasaun, promosaun no kargu lideransa nian, no loke dalan ba ajente polísia feto barak liutan atu sae ba responsabilidade aas liu iha Komandu-Jeral PNTL nian, tuir pratika diak internasional nian,” katak nia.
Xefe Estadu hatutan investe iha feto sira neebe iha talentu iha forsa polísia mak investe iha instituisaun ida neebe reprezentativa liu, umana liu no efekas liu. Nunee mos investe iha sosiedade ida neebe justa liu, igualitaria liu no segura liu ba timor-oan tomak.
(eme)
