DILI, STLTIMORLESTE.com – Prezidente Republika (PR), Jose Ramos Horta hateten, familia no komunidade sira mak hanesan mestre no defensor dahuluk hodi kuidadu oan sira.
Lia hirak hatoo husi Prezidente Republika (PR) Jose Ramos Horta ba jornalista sira liu husi nia diskursu, hafoin halo abertura ba konferensia nasional ba dala 2, kona-ba Edukasaun Infansia iha Salaun Oka, Dili, Kinta (05/09/2025).
“Hau hakarak dirije, apelu espesial ida nee ba ita nia sosiedade nia fuan, familia no komunidade lokal sira, ita boot sira mak mestre no defensor dahuluk hodi kuidadu ami nia oan sira, iha uma, eskola no aldeia, sira mak kria ambiente neebe krusial liu, ba sira nia dezenvolvimentu, ita boot sira nia partisipasaun ativu tebes,” dehan Horta.
Horta dehan, konferensia nasional daruak ba Edukasaun Infansia, Primeiru nee importansia boot tebes hodi reflete kompromisu ida neebe mak fo ba ema idak-idak atu bele hadia labarik sira nia futuru sai prosperu no estabilidade.
“Ita hahu konferensia importante ida nee, mai ita reafirma ita nia kompromisu atu habelar asesu, hadia kualidade, edukasaun no hametin kualidade edukasaun infansia, ida nee laos deit investimentu ba ita nia oan sira, no investimentu ida iha futuru prosperidade no estabilidade iha ita nia nasaun,” katak Horta.
Horta tenik, sei hamutuk ho parseria nasionál no internasional harii futuru ida prosperu, nunee labarik idak-idak iha Timor Leste iha oportunidade atu aprende buras, husi tinan dahuluk sira moris nian.
“Bainhira labarik sira sai boot iha ambiente neebe garante saude, seguransa no asesu ba edukasaun ho kualidade, sira iha posibilidade boot liu atu atinji sira nia potensial tomak no sai kontribuinte ativu ba vida sosial, ekonomika no sivika, nunee labarik idak-idak iha TL bele hetan oportunidade atu bele aprende ho diak no buras liu tan,” dehan Horta.
Horta afirma, aprendizajen fundamental refere ba abilidade esensial sira neebe hetan iha infansia, no tinan dahuluk eskola primaria nian, hodi forma fundasaun ba edukasaun no dezenvolvimentu pesoal hotu iha futuru.
“Aprendizajen fundamental neebe forte no krusial permite aprendizajen durante moris tomak, adaptabilidade, no susesu iha futuru labarik sira neebe la hatene lee ho tinan 10 hasoru difikuldade akademika signifikativu, neebe lori ba taxa abandonu eskolar neebe aas, rendimentu neebe kiik, saude neebe la diak, no siklu kiak neebe persistente,” dehan nia.
Enkuantu edukasaun infansia laos de’it kestaun ida kona-ba politika edukasaun nian, maibe ida nee estratejia fundamental ida atu promove kualidade, haburas kreximentu inkluzivu no dudu dezenvolvimentu sustentavel.
Jornalista: EST 1
Editor: Xisto Mendonça
