DILI, STLTIMORLESTE.com – Prezidente Republika (PR) Jose Ramos Horta hatete, Festival Rabilau sai hanesan atrasaun Turistiku Internasional.
Prezidente Republika Jose Ramos Horta hatoo lia hirak nee ba jornalista sira bainhira remata vizita privadu ba Australia, iha Aeroportu Prezidente Nicolau Lobato Dili, Sabadu (12/10/2024) hatete, eventu Festival Rabilau nee inisia husi Prezidente Republika ho Governu, no festival nee sai hanesan Atraisaun Turistiku Internasional.
Iha biban nee, Prezidente Republika hatete, nia sei partisipa Festival Rabilau iha loron 15, tanba nee inisiativa Prezidensia Republika no Governu nian, maibe sei atrai turista internasional no Nasional sira.
Xefe Estadu hatete, inisia husi Governu no Prezidensia, maibe insiativa nee uluk kedas ona, Xefe Suku sira iha Maubesi sira mak hahu tinan 20 liu ba, ho apoiu oituan husi Ministeriu Turizmu.
PR hatete, Festival nee hotu-hotu sei buka atu partisipa, no PR Horta sei ba loron 15 Outubru, nee insiativa ida husi Prezidensia no Governu. Prezidensia Republika mos fo apoiu kedas, tanba tinan kotuk haree bele sai ba oin, festival boot ida nivel rejional, kontinua halo buat oin seluk, laos hotu-hotu halo iha rejiaun nee, halo Timor nian duni.
Hanesan uniku halo promosaun ho tempu antesipadu fulan 6 antes festival halo ona promosaun nee sei sai atraisaun turista ida boot.
“Hau fiar tanba hau haree fatin nee, programa Rabilau halo nee tuir buat neebe hau defende halo esimulasaun kazamentu Timor nian barlake, konta istoria aikananoik buat sira nee sei sai atraisaun turistiku internasional ida. Ami halo reuniaun konjuntu, Visi Primeiru Ministru, inter-sektoral, inter-ministerial needuni sei sai kapaas,” hakotu PR Horta.
Festival Rabilau nee halao iha Foho Rabilau, iha Postu Administrativu Maubisi, hahu husi loron 16 fulan Outubru too loron 19 fulan Outubru tinan 2024.
Festival Rabilau hanesan baze importante ida ba Programa Nasional Promosaun Turizmu Timor Leste nian, ho objetivu atu hametin industria nasional sira iha arte no kultura, nunee mos promove rikusoin eransa kultural , tradisaun no beleza naturál nasaun nian.
Eventu ida nee nuudar rezultadu husi esforsu kolaborativu entre Prezidénsia Republika no IX Governu Konstitusionál. Forma ona komisaun konjunta ida ho Prezidente Republika José Ramos Horta nuudar patronu no Segundu Visi Primeiru Ministru Mariano Assanami Sabino lidera inisiativa nee.
Festival nia programa oin-oin inklui aprezentasaun kultural neebe hatudu muzika, dansa no instrumentu tradisional Timor nian. Kompetisaun arte iha pintura, muzika koremetan no arte dijital. Kompetisaun gastronomia no feira neebe hatudu hahan lokal. Feira livru nian no bazar produtu lokal nian.
Aprezentasaun muzika moderna husi artista Timoroan sira. Atividade ba labarik sira no sinema. Eventu desportu lokal sira. Esplorasaun guiada ba foho Rabilau.
(eme)
