OEKUSI, STLTIMORLESTE.com – Prezidente Republika (PR), Jose Ramos Horta fiar ho Orsamentu Jeral Estadu (OJE) 2025 neebe mak promulga ona, Governu bele ezekuta no dezenvolve ekonomia iha rai laran.
Xefe Estadu hatoo lia hirak nee liu husi diskursu, iha selebrasaun loron proklasaun unilateral indepedensia ba dala 49, iha RAEOA, Kinta (28/11/2024).
“Hau konfia orsamentu neebe aprova no promulga tiha ona, depois tinan 2025, governu sei aselera ezekusaun orsamentu no dezenvolve ita nia ekonomia,” dehan PR, Horta.
Timor Leste tuir Xefe Estadu preparadu ona atu sai membru ASEAN, no Timor Leste mos la hakfodak. “Tinan 2025, hau espera ita tama ASEAN. Ita preparadu ona atu tama ASEAN. Iha Setembru 2024, ita bele simu Amu Papa, jornalista atus-tolu mai, populasaun besik 700 mil mak partisipa. Governu konsege organiza lojistika, seguransa, no vizita nee lao 100% diak loos. Nee duni atu simu ministerial ASEAN ka simeira ASEAN iha Timor Leste, nee ita la hakfodak, ita tama tiha ona organizasaun mundial komersiu. Ita membru g7+, estadu frajil, ita membru ativu CPLP no ativu iha debates kona-ba Climate Change, no TL liu husi ita nia tekniku sira, espert sira lidera forum boot oin-oin, buat sira nee. Nee duni, Timor prontu atu tama ASEAN iha 2025, durante Malazia nia prezidensia ASEAN,” hatete Xefe Estadu.
Entretantu ikus liu Xefe Estadu husu ba hotu-hotu saida mak kontribuisaun diak ba mundu, ba ASEAN, kontribuisaun diak liu mak ida nee, hametin dame iha rai-laran. Soe violensia, haklean estabilidade, haklean demokrasia liberdade, laiha violensia polítika, laiha violensia diskrimiasaun relijiozu, ou etniku, ou ba difisiente sira, ou ba LGBTI sira. Rai ida nee tenke ezemplu duni.
(eme)
