DILI, STLTIMORLESTE.com – Prezidente Republika (PR), Jose Ramos Horta hatete, Governu Reinu Unidu atende povu Timoroan neebe lao ilegal iha Inglatera ho dignu.
Prezidente Republika, Jose Ramos Horta hatoo kestaun nee bainhira remata Vizita Trabalhu nasaun Bulgaria ho reuniaun fila hikas mai Timor Leste, iha Aeroportu Internasional Nicolau Lobato, Komoro Segunda (28/04/2025).
“Atitude komportamentu Governu Reinu Unidu nia diak tebes pozitivu, Timoroan sira neebe iha situasaun ilegal ba aprezenta iha entidade ofisial neebe kaer prosesu ida nee sira trata diak seluk viajen fila mai Timor, bainhira sira tama iha aviaun laran tuur iha sira nia kadeira elementu ida Governu entrega ba sira kartaun ida sira bele lori ba BNU foti ekivalente kuaze 4 mil dolar 3 mil ital dolar, depois tinan 5 iha nee sira bele hatama surat para fila ba inglatera legalmente para serbisu Iha neeba, nemak sira halo aplauze ba ida nee hatudu Governu ingles nia atitude humanu no diak tebes neebe rai balun halo hanesan nee, duni sai deit ema, maibe iha neeba Timor oan barak lao ilegal barak mos kontinu iha neeba,” katak PR, Horta.
Prezidente Republika hatete, Governu Reinua Unidu hatudu atitude humanu ba Timoroan neebe lao ilegal hodi buka moris iha Reinu Unidu, barak mos lao tuir dalan legal ho pasaporte Português no Timorense neebe legalizadu ona.
Aleinde nee PR simu ona Proposta Lei Judisiaria no halo ona promulgasaun ka lae, hatan ba kestaun nee Prezidente Republika hatete, agora foin mak too no orsda Lokraik sei halo promulgasaun.
“Orsida loraik hau sei halo promulgasaun, no Proposta neebe simu ona agora iha ona Palasiu,” katak Prezidente Republika.
Aleinde nee Prezidente Republika Jose Ramos Horta halo enkontru ho Primeiru Ministru Novazelandia hodi reafirma amizade entre nasaun rua.
Prezidente Republika, Jose Ramos Horta halao enkontru kortezia badak maibe signifikativu ho Primeiru Ministru Nova Zelandia Christopher Luxon iha Aeroportu Heathrow Londres nian. Enkontru neebe la-espera akontese bainhira líder rua nee tranzita liu husi terminal hanesan durante sira nia kompromisu internasional ketak.
Maske ho natureza informal, enkontru nee fo dalan ba interkambiu kordial ida entre líder nain rua neebe reafirma amizade metin entre Timor Leste no Nova Zelandia. Sira nain rua espresa sira nia hakarak atu hametin kooperasaun bilateral, partikularmente iha edukasaun, agrikultura, reziliensia komunitaria, no apoiu ba dezenvolvimentu.
Enkontru nee simboliza vontade diak no importansia mutua neebe nasaun rua tau iha harii parseria konstrutivu no sustentavel sira iha rejiaun Pasífiku no Azia-Pasífiku. Prezidente Ramos Horta iha Reinu Unidu ba serie kompromisu diplomatiku sira.
(eme)
