BAUKAU, STLTIMORLESTE.com – Prezidente Republika (PR), José Ramos Horta hateten, Governu tenke haree problema salariu minimu neebe trabalhador sira enfrenta, tanba salariu US$ 115.00 no US$ 130.00 neebe aplika la fo impaktu ba nesesidade trabalhador sira.
Kestaun nee PR José Ramos Horta hatete ba jornalista sira, bainhira partisipa selebrasaun loron fundasaun Baukau ba dala 166, neebe realiza iha Salaun Sentru Konvensoens Vila Antiga, Baukau, Kinta (01/05/2025)
“Hau apoiu, tenke haree salariu aktual US$ 115.00, US$ 130.00 nee badak demais, maibe tenke hatun despeszas Estadu, Estadu rasik gasta osan lubuk ida ba Institutu Publiku, se produtividade efisiensia aat loos, maibe sira servisu iha neeba manan osan boot,” hateten PR, Horta.
Ramos Horta katak, atu rezolve salariu minimu US$ 115.00 no US$ 130.00 ba trabalhador sira, tenke hatuun despezas Estadu ba Institutu Publiku, tanba funsionariu sira hetan salariu boot, maibe servisu laiha produtividade no efisiensia.
PR fo kuitadu ba trabalhador sira neebe kada fulan manan salariu US$ 115.00, US$ 130.00, tanba la responde nesesidade.
“Estadu tenke hatudu justisa, justisa mak ida nee, labele balun manan osan boot tebe-tebes no balun aat liu, rai nee kiak entaun ita buka oinsa mak iha ekilibriu salarial iha rai ida nee,” katak PR Horta.
Mezmu nunee, PR Horta hateten, neineik sei fo solusaun ba trabalhador iha Timor Leste, maibe haree lai kondisaun ekonomika iha rai laran hafoin determina salariu ba trabalhador simu salariu US$ 115.00.
Tanba bainhira Governu laiha produtividade, disiplina no komitmentu aleinde sistema bankaria fo insentivu diak ba setor privadu, nee fo impaktu hodi aplika salarial minimu.
“Governu liu husi sistema bankaria fo insentivu diak ba setor privadu sira, para setor privadu bele aumanta bisnis. Entaun difisil tebes ita koalia lei salariu minimu hira, kompanhia neebe simu lei nee laiha kondisaun selu salariu minumu, se salariu minumu aas demais,” hateten PR Horta.
Tuir PR nee katak, atu aplika salariu minimu presiza dialogu entre konfederasaun sindikatu, setor privadu no Governu hafoin bele fo solusaun ba problema salariu minimu iha Timor Leste.
Aleinde mos Prezidente Republika nee fo solidariedade ba trabalhador sira iha Timor Leste no mundu tomak neebe ohin selebra loron trabalhador iha 01 Maiu nee.
“Solidariedade ho trabalhador sira hotu iha Timor Leste no iha mundu, neineik neineik iha Timor Leste laran ita buka fo protesaun diak liu ba trabalhador sira, mais ita hatene kondisaun ekonomika rai nian mak bele determina salariu,” PR Horta hakotu.
(tom)
