DILI, STLTIMORLESTE.com – Prezidente Republika (PR), Jose Ramos Horta hatete, Prezidente Autoridade Munisipiu Dili, Grigorio Saldanha rezigna aan husi nia kargu, tanba la konkorda atitude servisu Sekretariu Estadu Asuntu Toponomia no Organizasaun Urbana (SEATOU) nian.
“Hau hanoin nia rezigna aan tanba nia la konkorda karik ho atitude senhor Germano nian, hau hatete dala ida tan, hau konkorda hau apoia, hau husu ba populasaun favor labele hela iha mota laran mota ninin sira, labele okupa rai arbiru, fatin oan balu ita ba iha estrada ninin ita ba iha Matiaut mos nunee, no ba iha area branka mos nunee, fatin hotu hotu, iha foho lolon sira nee halo uma arbiru,” dehan Prezidente Republika, Jose Ramos Horta ba jornalista sira, iha Kantina Matak, Palasiu Prezidensial Nicolau Lobato, Bairo Pite, Dili, Tersa (28/01/2025).
Xefe Estadu hatete, ida neebe mak halo uma iha foho lolon ida nee perigozu los, uma sira neebe mak halo iha foho lolon sira nee tinan rua tolu mai uma lubuk ida mak sei monu, maibe atu halo eviksaun hasai ema tenke halo dialogu didiak, koalia didiak no buka kedas solusaun katak, sai husi fatin ba kedas iha neebe, halo kompensasaun depois idak-idak ba buka fatin nee mos diak.
“Mais entrega tiha lai osan nee depois mak lori trator ba, maibe tenke konkorda malu didiak, laos halo hanesan senhor Germano halo lori kedas polisia ho militar ba sobu no baku ema, hau mos la konkorda, ema faan modo iha luron husik ba, karik sira la atrapalha ema ruma, se mak atrapalha mak ema sira para karreta arbiru nee iha Dili laran hau haree polisia la book aan,” katak Horta.
Prezidente Republika mos lamenta ho polisia, tanba dala barak ema sira lori karreta para arbiru la haree, ba mak duni deit ema sira neebe mak faan sasan.
“Devia Governu halo merkadu neebe mak kualidade no merkadu foun modernu ke diak halo bairu-bairu ho kualidade, laos ida deit, se ida deit imposivel, maibe tenke halo merkadu ida diak iha kada bairu, kada suku, depois labele husik, tenke organiza sira estrada iha neebe mak labele faan ba, no loke iha tuku hira no taka iha tuku hira no saneamentu Dili loron-loron tenke ba hamoos, kuandu oras taka ona munisipiu taka kedas para hamoos, nee mak tenke halo, laos ba tebe ema no duni ema arbiru, tanba nee mak karik Prezidente Munisipiu Dili rezigna aan,” dehan PR, Horta.
Nunee mos Visi Diretor HAK, Antonino de Limas apresia ba desizaun husi Prezidente Autoridade Munisipiu Dili nia desizaun.
“Apresia ba dezisaun husi Prezidente Autoridade Munisipiu Dili neebe foti desizaun rezigna aan husi ninia pozisaun, hau hanoin ida nee ninia konsiensia rasik, ita haree ba kotuk rezignasaun nee relasiona ho servisu neebe nia halo knaar neebe fo ba nia nuudar Prezidente Munisipiu Dili, maibe nia implementasaun servisu balu liu-liu ligadu ho eviksaun sira neebe akontese hahu aitarak laran, iha Bidau ikus liu Fomento 2, hau hanoin husi notisia neebe ita asesu PAM Dili nia pozisaun ezijensia husi sosiedade sivil komunidade sira katak, despezu administrativu nee tenke lao ho lei neebe eziste,” hatete Antonino.
Nia hatete, eviksaun neebe lao tenke tuir lei neebe mak eziste, tanba lei hatete katak, bainhira muda komunidade sai husi hela fatin Governu tenke kria kondisaun, buat neebe lao la tuir lei neebe mak iha.
(eme)
