DILI, STLTIMORLESTE.com – Prezidente Republika (PR), Jose Ramos Horta hatete, presiza halo remodelasaun ba Membru Governu neebe la halo servisu, maibe ida nee kompetensia husi Primeiru Ministru Kay Rala Xanana Gusmão.
Prezidente Republika Jose Ramos Horta hatoo kestaun nee ba jornalista sira bainhira remata halo enkontru ho Prezidente Konselhu Ministru iha Kantina Matak Palasiu Prezidensial Nikolao Lobato, Bairo Pite, Tersa (01/07/2025).
“Hau hanoin presiza duni buat neebe normal iha mundu mak iha remodelasaun, remodelasaun nee kuaze iha rai hotu-hotu tinan 1 liu tiha halo remodelasaun, tanba la halo remodelasaun entaun interpretasaun hotu-hotu servisu diak entaun la presiza halo remodelasaun, maibe nee ita bele hatete imposivel maibe nee mandatu no kompetensia Primeiru Ministru nia, hau sei la hatete atu hasai ida nee no ida neeba, tanba atu temi ministru ida ka ida neeba hau la hatene servisu sira nia lao oinsa nee Primeiru Ministru mak hatene,” dehan PR Horta.
Prezidente Republika hatete, ema neebe mak iha kompetensia atu halo remodelasaun ba membru Governu nee so Primeiru Ministru, tanba nia mak loron-loron hamutuk ho Membru Governu, Prezidente Republika so hatene en jeral deit.
“Balun hau konhese diak tanba hau estuda hanesan Ministru Obras Publika, Banku Sentral, buat sira nee hau estuda maibe balun difisil atu prezidente mak halo avaliasaun, portantu hau husik ba Primeiru Ministru, balansu mak nee, buat komesa lao diak animadu povu kontente osan sirkula, osan husi ita nia ema sira iha Inglaterra, Australia, Korea, tama US$ 100 ital milhões tama ita nia ekonomia ke liu; tanba nee mak ita haree merkadu loja nakonu movimentu komersiu makaas tanba ekonomia book aan,” katak PR Horta.
Oinsa Prezidente nia observasaun ba servisu edukasaun no saude durante nee lao ka lae? Hatan ba kestaun nee Prezidente Republika hatete, kona-ba saude, Ministra Saúde mak simu kritika hotu maibe Ministra Saúde laos responsável ba SAMES importasaun medikamentu, nee institutu publiku Sames mak jestaun ba medikamentu.
“Ida fali laos Ministra Saúde mak halo intervensaun direita ba iha jestaun Hospital iha Diretor Hospital ida ka rua konforme sistema sira mak responsavel ba ida nee iha kritika oin-oin maibe iha buat barak mos ita tenke rekonhese sira servisu makaas diak iha hospital salva ema barak nia vida, hau ba beibeik iha neeba laiha politika ruma iha Timor ba vizita hospital hanesan hau ba,” katak PR Horta.
Prezidente Republika hatete, nia sempre vizita HNGV fatin neebe moos no mediku sira atende pasiente ho diak, dala ruma moras nakonu iha hospital tanba moras dengue maibe dala ruma mos ema ladun barak, maibe klaru katak presiza hadia diak liu tan.
(eme)
One Response
Prejiza Remodelasaun ba MS Tamba pasiente mate barak Liu. No povu Agora lakon konfiansa ho MS, REALIDADE povu iha Balu Ina foho moras la ba baixa Tamba tauk atendimentu la Diak. Ezemplu, Dr. Sira tau konfiansa ba estagiadu Sira la kontrola pasiente too RAN sai husi Mangera, too mate.