DILI, STLTIMORLESTE.com – Prezidente Republika (PR), Jose Ramos Horta hatete, durante hasoru malu ho Sua Santidade Papa Leao iha vatikanu, koalia kona-ba situasaun Timor Leste (TL) no situasaun mundu internasional.
Prezidente Republika Jose Ramos Horta liu husi nia diskursu iha Palasiu Prezidensial Nicolau Lobato Bairo Pite, Segunda nee (24/11/2025) hatete, nia foin fila husi Santa Se Vatikanu, Roma, Amu Papa Leao XIV fulan hira ba kotuk mak simu eleisaun nuudar Amu Papa foun tuir Amu Papa Francisco nia dalan.
“Ita simu iha nee Amu Papa Francisco iha fulan Setembru tinan kotuk ba, too ohin iha Santa Se pelumenus mundu Katoliku hotu-hotu sei lembra Amu Papa Francisco nia vizita mai TL oinsa povu Timor Leste simu Amu Papa Francisco, no Amu Papa Leao mak Amu Papa foun joven, nia atleta jogu tenis koalia lingua barak, lingua estranjeiru barak no antes asumi kargu nuudar Amu Papa nia vizita rai 50, nia konhese rai barak barak iha mundu, nia ema simples hanesan Amu Papa Francisco, Papa Leao mai tuir Papa Francisco nia tradisaun hanorin no mensajen,” dehan PR Horta.
Prezidente Republika hatete, nia ba Vatikanu hanesan Xefe Estadu, no iha mundu nee Xefe Estadu barak laos deit rai estadu neebe maioria katolika, rai hotu hotu iha mundu katoliku, musulmanu, hindu, rai hotu-hotu sira nia liurai sira nia Rei, Xefe Estadu mos ba halo vizita estadu ba Santa Se hodi aprenzenta komprimentus ba Amu Papa.
“Tanba nee bainhira Amu Papa Leao hetan formasaun hau koalia kedas ho nunsiatura para hau ba halo vizita estadu ba aprezenta komprimentus nuudar estadu ida 99% Katoliku, ba iha neeba hasoru malu ho Amu Papa minutu 30, momentu neeba sira hatete ba hau enkontru nee normal 15 minutu nee diak ona, mais derepente Amu Papa haree oras hau haree oras, hau hatete ba Amu Papa diak liu hau sai ona sira seluk karik hein hela iha liur, se hau la hatete karik buat ruma diak hau labele tauk tan ita boot nia tempu reuniuan bele kontinua deit, ami koalia kona-ba situasaun iha TL, Amu Papa hatene diak liu tan tanba Santa Se sira nia informasaun 100%,” dehan PR Horta.
Situasaun ida neebe iha mundu liu-liu kona-ba igreja nunsiatura sira informadu diak tebes, tanba nee prezidente uza minutu 10 ka 20 la koalia kona-ba Timor Leste, tanba Papa Leao hatene diak situasaun TL.
“Ami koalia kona-ba situasaun internasional mos, nee laos hau hatete segredu ruma tanba ita hotu-hotu lee esteitmentu neebe mai husi Vatikanu Santa Se nia media, se mak hakarak akompanha Amu Papa nia liafuan fasil los bele ba instagram bele ba facebook media sosial oin oin ba akompanha, entaun ita rona Amu Papa nia koalia kona-ba situasaun Gaza, Palestina, Mianmar, Sudaun no seluk tan,” dehan PR Horta.
Prezidente Republika hatete, iha Vatikanu halo enkontru ho Sua Santidade Papa Leao koalia kona-ba situasaun Timor Leste nomos situasaun iha mundu internasional, liu-liu funu neebe akontese iha rai sira hodi hamate ema barak.
Iha biban nee Primeiru Ministru Kay Rala Xanana Gusmao hatoo benvindu ba Prezidente Republika Jose Ramos Horta neebe foin fila husi Roma, Vatikanu, no husu ba Sua Santidade Papa Leao nafatin haraik bensaun ba povu no rai doben Timor Leste.
Jornalista: Emerenciana Pinto
Editor: Xisto Mendonça
