DILI, STLTIMORLESTE.com – Prezidente Republika (PR), Jose Ramos Horta hatoo agradese ba nasaun Angola, tanba ho sinsero bele hametin lasu amizade ho Timor Leste (TL).
Prezidente Republika Demokratika Timor Leste, Jose Ramos Horta hatoo lia hirak nee liu husi nia diskursu, bainhira partisipa Aniversariu Independensia Republika Angola nian ba dala 50 iha Hotel Timor, Sesta kalan (14/11/2025).
Iha biban nee Prezidente Republika hatoo agradesimentu sinseru ba Embaixador Jose Andrade de Lemos, no ninia ekipa dedikadu, ba knaar fundamental neebe sira halao hodi habelar no hametin relasaun entre Timor Leste no Angola.
“Ita boot sira nia dedikasaun neebe la hatene kolen kontribui loron-loron hodi hametin lasu istoriku, kultural no polítiku sira neebe halibur ita-nia povu sira,” dehan PR Horta.
Prezidente Republika hatete, ezemplu konkretu husi kooperasaun nee mak kontribuisaun neebe halo iha area saude nian, ho kolokasaun iha Timor Leste espesialista neurosirurjiaun angolanu ida neebe, liu husi Cruz Vermelha Internasional, servi ona ho povu ho dedikasaun ezemplar. Jestu nee simboliza espíritu solidariedade no fraternidade neebe karakteriza parseria entre país sira.
“Permite hau hatoo hau nia votus ba saude diak, ksolok pesoal no susesu kontínuu ba Señor Prezidente João Lourenço, no mos prosperidade, estabilidade no moris-diak ba Povu Maun-Alin Angolanu. Atu selebrasaun ida-nee bele inspira jerasaun foun sira atu kontinua serbisu harii nasaun no hodi lao ho konfiansa iha dalan progresu nian,” dehan PR Horta.
Iha biban nee Prezidente Lori povu Timor Leste nia naran, agradese ba amizade, solidariedade no parseria istorika neebe halibur ona povu nasaun rua.
Serimonia Aniversariu Independensia Republika Angola nian ba dala-50 halao iha Hotel Timor Díli, Timor Leste, partisipa direita husi Prezidente Republika Jose Ramos Horta, korpu diplomatiku, Embaixador Jose Andrade de Lemos, Distintu Membru Governu, Parlamentu Nasional, Autoridade no Reprezentante Orgaun Soberania, Membru Korpu Diplomatiku no Ajensia Kooperasaun sira Reprezentante sira husi Organizasaun Sosiedade Sivíl sira.
Iha biban nee Prezidente Republika hatoo agradese ba Angola neebe kontinjente desportivu Angola nian ba partisipasaun iha XII Jogu Desportivu Komunidade País Lian Portuges (CPLP), neebe halao iha Díli, iha fulan jullu tinan ida nee.
Sira nia prezensa destaka espíritu amizade no kooperasaun neebe karakteriza país sira no reforsa lasu sira neebe halibur hodi promove desportu no juventude.
Jornalista: Emerenciana Pinto
Editor: Xisto Mendonça
