DILI, STLTIMORLESTE.com – Prezidente Republika (PR), Jose Ramos Horta hatoo agradese ba Embaixadora Portugal ba Timor Leste (TL) neebe dedika sala ida ho naran sala Jose Ramos Horta iha Embaixada Portugal.
Bainhira remata inaugura, Prezidente Republika (PR) Jose Ramos Horta ba jornalista sira iha Embaixada Portugal, Kuarta (06/08/2025) hatoo agradese ba Embaixadora Portugal ba Timor Leste tanba bele deside hodi didika sala ida iha embaixada Portugal ho naran Jose Ramos Horta.
“Hau agradese ba senhora embaixadora neebe deside halo fatin ida nee didikadu ba luta diplomatika bolu sala Jose Ramos Horta, hau agradese maibe hau hatete Timor Leste deve buat boot ba Portugal, Portugal nia diplomasia maibe mos primeiru uluk situasaun iha rai laran, situasaun rai laran mak hatudu solusaun saida rezistensia rai laran,”
Prezidente Republika hatete durante luta nia halo dipolomasia iha rai liur tuir buat neebe nia bele, maibe Prezidente Republika agradese ba luta nain sira neebe mak luta iha rai laran.
“Iha liur hau halo buat neebe hau halo hotu hotu hatene hau agradese maibe seluk mos barak ajuda solidaridade, portantu hau agradese ho laran maibe hau sempre hatete luta liu liu iha rai laran I mudansa tanba iha Indonezia Soharto monu Habibie mai negosiasaun aselera I referedu akontese indepedensia akontese laos tanba ema ida ka rua,” dehan Prezidente Republika.
Iha fatin hanesan Embaixadora Portugal ba Timor Leste, Manuela Bairros hatete, ohin halo inaugurasaun ba sala iha embaixada Portugal ida neebe tau naran sala Jose Ramos Horta.
Sala nee tau naran sala Jose Ramos Horta, tanba haree esperensia Ramos Horta assume kargu Prezidente dekada rua, no Prezidente hanesan ema neebe diplomata, no premiado nobel da pas.
No Sala tau naran Sala Jose Ramos Horta reprezenta lider Timoroan sira hotu neebe durante luta tinan 24 nia laran iha frente diplomatika hodi lori rai nee hetan ukun rasik aan.
(eme)
