DILI, STLTIMORLESTE.com – Prezidente Republika (PR), Jose Ramos Horta hatete, iha Hospital Nasional Guido Valadares (HNGV) falta fasilidade hodi halo tratamentu ba pasiente sira, atu rezolve imediatu transfere ba Hospital Atambua hodi halo tratamentu, tanba besik.
Prezidente Republika, Jose Ramos Horta hatoo kestaun nee ba jornalista sira, bainhira remata partisipa Seminariu Nasional ba loron Aniversariu PNTL ba dala XXV, ho tema “Hamutuk Ita Hametin Konfiansa Polisia Nasional Timor Leste”, iha Sentru Formasaun PNTL, Komoro, Dili Tersa (11/03/2025).
Prezidente Republika hatete, transfere pasiente hodi halo tratamentu iha Atambua, tanba haree distansia besik ho Timor Leste no ladun gastu, tanba nee Prezidente husu intelektual ka akademiku sira kritika presiza hanoin.
“Ema sira be koalia nee dala ruma problema Timor ho ita nia intelektual akademiku balu seidauk haree didiak razaun saida mak koalia ba ida nee, halo komentariu ba ida nee, mais buat ida simples tanba iha neeba Hospital Atambua besik rabat los Maliana fronteira nee familia iha sorin balu Timoroan barak iha Atanbua neeba no sorin rua nee hotu, problema liu-liu mak sira neebe problema ho rins nee dala ruma iha HNGV falta makina la sufisiente ou avaria entaun atu rezolve imediatu fasil haruka ba Atambua,” katak PR, Horta.
Prezidente Republika hatete, oras nee daudaun Governu mos esforsu hela fasilidade oinsa halo tratamentu ba pasiente sira, maibe la sufisiente entaun karik situasaun emerjensia haruka ba Atambua.
“Hanesan Timor iha kualidade ruma iha HNGV salva ona ema balu, hau hatene momentu iha neeba hau haree dilema ida senhor ida atu mate daudaun doutor Timoroan nain 4 mak salva nia, sira hotu-hotu iha neeba, sira hakerek iha media sosial sira admira ho doutor sira mais dala ruma situasaun ezije haruka ema nee ba Atambua, hau rasik hau nia staf ida iha prezidensia nia hetan moras struk hau mak haruka trata iha Kupang, momentu nia iha hela Atambua halo servisu ruma sira trata diak, nia kontente,” katak nia.
Nia hatutan ,Timor Leste iha relasaun diak ho NTT, Indonezia, tanba nee buka kolabora, maibe balu aproveita ho situasaun sira nee hodi koalia aat.
Foin lalais Primeiru Ministru Kay Rala Xanana Gusmão hatete, Prezidente Republika foin lalais observa hospital iha Atambua fasilidade diak, tanba karik iha pasiente balu neebe labele kura iha HNGV bele transfere ba Atambua hodi halo tratamentu diak, duke transfere ba Singapura Malazia no nasaun seluk neebe ho kusta boot.
(eme)
