DILI, STLTIMORLESTE.com – Prezidente Republika (PR), Jose Ramos Horta husu Autoridade Bulgaria labele simu nia ho Guarda de Ondra, hodi fo ondra ba Sua Santidade Papa Francisco neebe Nai bolu hikas ona iha nia kadunan Santu.
Simplisidade husi Prezidente Republika hatudu durante ninia vizita ofisial ba Bulgaria husi loron 20 too 23 Abril. Prezidente husu ba autoridade Bulgaria nian atu labele simu nia ho guarda de onra iha aeroportu hodi hatudu respeitu ba sira nia Feriadu Paskua Ortodoxu Kristaun sira nian.
“Iha Timor Leste ita valoriza simplisidade no respeitu ba tradisaun ema seluk nian liu serimonia. Lideransa lo-loos laos hatudu liu husi protokolu maibe liu husi komprensaun ba fuan povu nian,” dehan Prezidente Ramos Horta liu husi Komunikadu neebe STL asesu husi media PR, Kinta (24/04/2025).
Iha Bulgaria Prezidente ho ninia delegasaun mos vizita Igreja Ortodoxu Kristaun iha Segunda-feira, 21 Abril, hodi hatudu ninia kompromisu ba armonia interrelijioza no respeitu kultural.
Durante iha Bulgaria, Prezidente Ramos Horta simu notísia kona-ba falesimentu Sua Santidade Papa Francisco. Prezidente hatoo kedas ninia sentidu kondolemsia profunda no orienta ninia gabinete hodi haruka karta ofisial ba Vatikanu.
Prezidenti Ramos-Horta mos simu intervista husi media internasional sira kona ba falesimentu Sua Santidade Papa Francisco, nuudar Prezidente ba Timor Leste, segundu nasaun Katoliku boot liu tuir persentajen hafoin Sidade Vatikanu.
“Hau sente laran triste klean husi ita-nia nasaun. Sua Santidade fo bensaun mai ita-nia rai ho ninia prezensa fulan hirak liuba, lori naroman no esperansa mai ita-nia povu. Agora, bainhira ita halerik ba nia falesimentu, ita sei fo onra ba ninia memoria liuhusi orasaun no reflesaun,” afirma Prezidente Ramos Horta.
Resposta imediata husi Prezidente iha rai liur hatudu importansia Papa Francisco mai Timor-Leste no reforsa Prezidente Ramos Horta nia kompromisu ba valor espiritual neebe hakat liu fronteira nasional sira.
(eme)
