SALELE, STLTIMORLESTE.com – Prezidente Republika (PR), Jose Ramos Horta husu deskulpa ba povu Fronteira, tanba tinan barak ona Estadu la tau matan ba infraestrutura.
Prezidente Republika, Jose Ramos Horta hatoo liafuan deskulpa nee liu husi nia diskursu, bainhira remata fahe nesesidade baziku ba komunidade uma kain 40 iha Suku Biseuk, Postu Administrivu Tilomar, Munisipiu Kovalima, Kinta (27/03/2025).
Prezidente Republika husu deskulpa ba povu Fronteira, tanba tinan hira nee Estadu seidauk hadia Estrada, nunee difikulta komunidade lori sira nia sasan ba merkadu.
“Nee duni hau husu deskulpa ba povu iha Fronteira, tinan hira nia laran Estadu la tau matan ba kondisaun infraestrutura iha aldeia, suku, postu no munisipiu iha Fronteira, mezmu iha Maliana Vila, tama Maliana Vila moe fali estrada koak boot iha Maliana Vila, Bobonaro mos nee duni, hau espera loron ruma Primeiru Ministru bele mai vizita para haree ho matan situasaun iha nee,” katak PR Horta.
Prezidente Republika lori Estadu Timor Leste nia naran husu deskulpa ba povu Fronteira tomak, tanba Timor ukun aan tinan barak ona, maibe Estadu seidauk tau matan ba povu iha Fronteira.
“Iha nee hau husu deskulpa ba imi lori Estadu nia naran no nuudar Prezidente 20 Ital anos ona iha imi nia suku nomos iha Fronteira tomak laos imi nia suku deit, Estadu seidauk tau matan, laos halo imi hotu-hotu riku, laos halo hotu-hotu iha kareta maibe liu-liu apoiu agrikultura iha zona Fronteira,” katak PR, Horta.
Xefe Estadu hatete, agrikultura atu lao diak presiza apoiu no hadia mos sistema irigasaun nunee agrikultura bele movimenta aan, no tenke hadia estrada para populasaun agrikultura neebe kuda hahan no hakiak animal fasil hakat ba merkadu.
“Estrada la diak no dalan neebe aat tebes entaun ema neebe fo aluga kareta ba imi atu tula sasan maibe folin karun tebes entau oho tiha inisiativa pribadu, inisiativa familiar sira neebe buka moris ho vida agrikultura nee mak realidade ekonomia, buat sira nee hotu ligadu, ita labele halo deit estrada rural, tenke hanoin mos dezenvolvimentu integradu,” katak PR Horta.
Xefe Estadu hatete, laos buat boot maibe koalia deit kona-ba dezenvolvimentu maibe oinsa mak apoiu ba povu agrikultura sira.
Nunee mos tau matan ba animal, Ministru Agrikultura no Veternariu sira tenke haree para prevene moras, se lae moras oituan mai halo animal mate hotu, tanba iha Timor hanesan mos rai barak moras ruma husi liur mai halo animal mate hotu.
(eme)
