DILI, STLTIMORLESTE.com – Prezidente Republika (PR) Jose Ramos Horta husu Governu atu tau matan ba trabalhador Timoroan iha Australia no Inglatera, nunee sira bele servisu hetan osan diak haruka mai familia iha Timor Leste.
Prezidente Republika Jose Ramos Horta hatoo lia hirak nee ba jornalista sira bainhira remata partisipa eventu ai-haan mundial iha Kantina Matak Palasiu Prezidensial Bairo Pite, Tersa nee (15/10/2024).
PR preokupa makaas ba trabalhador Timoroan iha Australia no Inglatera, tanba nee husu Governu tau matan.
Prezidente hatete, liga ho trabalhador iha Australia, PR laos koalia primeira vez, uluk kuandu Ministru Negosiu Estranjeiru koalia no foin lalais fila husi Austrália koalia ho nian, no nia defende kedas.
“Too agora problema iha Australia la rezolve, tanba nee hau hakaas iha fatin barak-barak iha media no iha Australia. Trabalhador sira seluk, alojamentu karun, toba fatin ema nain 8 iha kuartu ida, depois iha kuartu nee hanesan andar, hamutuk sira nain 8 bele selu US$ 700, ida nee karun liu fali hotel ida. Depoik trabalhador sira tenke selu tan impostu, se ema Australia selu impostu nee bele diak, tanba buat hotu-hotu gratuita iha neeba, ba mediku gratuita. Maibe, ita nia trabalhador sira laiha, sira tenke selu programa ida medical, depois husi ba servisu, tanba iha bis ida selu US$ 9, kestaun sira nee mak hau hatete, tenke hamate tiha,” katak PR Horta.
Prezidente Republika hatete, relasiona ho problema neebe mak trabalhador sira hasoru, tempu badak buka atu rezolve nunee Timoroan sira bele haruka osan barak mai Timor Leste.
“Tanba nee, hau hanoin tempu badak sira sei haree problema nee, para Timoroan sira bele lori osan barak liu mai uma. Maibe, governu mos tenke tau matan ba trabalhador Timoroan sira nee, trabalhador sira nee iha Australia no iha Inglaterra, Koreia haruka osan barak mai ekonomia Timor, governu haree oinsa supseria sira nia viajen ba Koreia, Australia no Inglaterra, para bilhete aviaun nee la bele osan boot nia, para sira la bele husu fali dívida ka tusan,” katak nia.
Xefe Estadu hatete, Timoroan iha neeba buka moris iha Australia no Inglaterra no Korea kontribui makaas ekonomia Timor Leste, tanba nee Governu presiza iha Politika diak para apoiu sira.
“Maibe, governu dezde uluk kedas too agora seidauk halo polítika neebe mak diak para apoia ita nia trabalhador sira ba liur, trabalhador sira ba liur nee, sira kontribui makaas liu ba ekonomia Timor nian, duke ministru sira barak-barak, Sekretariu Estadu, Asesor no adidu sira,” katak nia.
Prezidente mos sei koalia ho Governu liu husi Primeiru Ministru Kay Rala Xanana Gusmão atu bele fo orden ba SEFOPE hodi nunee bele hadia programa sira nee.
“Tanba nee, hau sei koalia ho SEFOPE, maibe klaru liu-liu koalia ho Primeiru Ministru para haree, tanba PM mak bele fo orden tun ba SEFOPE, para haree oinsa ita bele hadia liu tan programa ida nee, para osan bele boot liu tama iha rai laran,” hakotu PR Horta.
(eme)
