DILI, STLTIMORLESTE.com – Prezidente Republika (PR) Jose Ramos Horta husu joven sira nafatin kria pas ho unidade, bainhira fila ba idak-idak nia munisipiu hodi selebra loron Finadu neebe mak monu iha loron 2 Novembru.
Hela semana 2 tama ona ba loron Finadu, hanesan loron matebian sira nia, no familia idak-idak neebe iha hela kapital Dili sei fila ba idak-idak nia munisipiu hodi lori lilin no aifunan ba rate hodi vizita halo orasaun ba matebian sira tuir tradisaun idak-idak nia.
iha biban nee, Prezidente Republika Jose Ramos Horta husu ba sidadaun hotu liu-liu ba joven sira katak, bainhira fila ba idak-idak nia hela fatin hodi asiste loron Finadu neebe monu ih loron 2 Novembru, husu idak-idak nafatin hatudu respeita ba matebian sira liu husi kria unidade no pas iha idak-idak nia fatin.
Prezidente Republika hatoo lia hirak nee ba jornalista sira bainhira remata partisipa loron mundial ba ai-haan iha Kantina Matak Palasiu Prezidensial Bairo Pite, Tersa (15/10/2024).
Prezidente Republika haktuir tan katak, loron 2 Novembru hanesan loron ba matebian sira, no loron nee importante tebes, tanba nee familia sira nafatin hatudu respeita, husu hadook aan husi krime no violensia, hakmatek halo orasaun ba matebian sira nia klamar atu bele moris hakmatek rohan laek iha Nain nia kadunan Santu.
“Apelu ba joven sira, hatudu respeitu ba matebian sira, kuandu too loron finadu, ita vizita família no vizita kolega sira, hatudu respeitu no domin ba sira neebe mak la iha ona iha rai ida nee. Maibe, tanba sira iha mundu seluk, sira sente no sira haree situasaun iha rai laran oinsa,” katak PR Horta.
Moris iha Mundu nia rohan mak mate, no baimhira laiha ona mundu familia neebe mak sei moris iha mundu nafatin halo orasaun ba maluk matebian sira neebe mak mate ona, nunee klamar bele moris hakmatek rohan laek iha Nain nia kadunan Santu.
(eme)
