DILI, STLTIMORLESTE.com – Prezidente Republika (PR), Jose Ramos Horta husu Konselhu Imprensa (KI) bele rekomenda jornalista sira nia naran ba iha Prezidente Republika, nunee bele hetan mos kondekorasaun.
Prezidente Republika Jose Ramos Horta hatoo lia hirak nee ba jornalista sira hafoin vizita Autoridade Munisípiu Dili iha Kaikoli, Kuarta (15/10/2025).
PR Horta hatete, relasiona ho eis jornalista balun neebe kestiona kondekorasaun, mak Prezidente Republika Jose Ramos Horta husu KI atu rekomenda jornalista sira nia naran neebe halao kobertura iha tempu okupasaun Indonezia, nunee serimonia ruma PR fo kondekorasaun.
PR Horta dehan, nia la inventa jornalista estranjeiru ka jornalista nasional nia naran, tanba nee KI hakarak bele hatoo naran ba Prezidente nunee bele hetan mos kondekorasaun.
“Hau la inventa ema estranjeiru ka ema nasional nia naran. Se iha nasional ruma nia naran neebe Konsellu Imprensa ka kolega jornalista sira hakarak rekomenda nee hau haree kedas,” dehan Prezidente Republika.
Xefe Estadu hatutan, jornalista balun neebe nia konhese mate iha Lospalos ho madre sira maibe too oras nee seidauk hetan mos rekonhesimentu ruma husi estadu.
“Klaru balun hau konhese, agora iha loron 16 jornalista ida Indoneziu mate iha Lospalos ho madre sira, ida nee mos nunka too agora seidauk rekonhese,” dehan PR Horta.
Xefe Estadu hatete, jornalista foinsae agora barak tebes neebe kada loron halao kobertura, maibe iha tempu luta liu-liu iha 1975 sira seidauk moris tan.
“klaru imi sira jornalista joven barak nee iha 1975 imi balun seidauk moris tan,” dehan PR Horta.
“Purtantu, tanba nee mak la kondekora imi, imi sorti foin mak moris. Maibe uluk 1975 tempu luta laiha jornalista Timoroan ida neebe partisipa iha media, tanba laiha,” katak Horta.
Xefe Estadu iha tempu neebe difisil Timor oan sira balun mos halo servisu hamutuk ho jornalista estranjeiru ida neebe mak kontribui ba Timor Leste liu husi foti filmajen, nee mak jornalista Max Stahl.
“Mais balun servisu hamutuk ona sira ajuda Max Sthal, hau simu rekomendasaun ruma nee klaru, hanesan kondekorasaun ba veteranu sira,” nia hatete.
Aleinde nee, PR Horta esplika, nia fo kondekorasaun mos aileba sira, uniku Prezidente Republika iha mundu fo kondekorasaun ba aileba sira, laiha tan iha mundu nee, Prezidente Republika neebe kondekora fali aileba sira, tanbasa mak kondekora aileba sira, tanba kuitadu ema sira nee loron-loron lao ba mai buka moris.
“Klaru, nee hau la ijitasaun, favor fo naran mai, Timorense ka Indonezia, tanba uluk tempu Indonezia jornalista Indonezia balun hau konhese, balun mate kleur ona. Timoroan momentu neeba Jornal neebe iha mak hau rona Suara Timor Timur nee, klaru nee laiha problema,” Katak nia.
Iha biban nee nia husu karik hatene jornalista neebe kontribui ba ukun rasik ida nee bele haruka naran ba Xefe Estadu, nunee bele hetan mos rekonhesimentu.
Jornalista: Emerenciana Pinto
Editor: Xisto Mendonça
