DILI, STLTIMORLESTE.com – Prezidente Republika (PR), José Ramos Horta dehan, Timor Leste naran morin bainhira nunka husik divida iha Hospital Estranjeiru, tanba nee husu Governu labele demora, osan iha selu ona.
Prezidente Republika, José Ramos Horta hatoo kestaun nee ba jornalista sira bainhira remata vizita servisu ba Portugal no fila hikas mai Timor Leste iha Aeroportu Internasional, Nicolau Lobato, Tersa (29/11/2024).
Xefe Estadu hatete, osan iha diak liu selu kedas labele demora, maibe antes selu Governu mos presiza haree didiak Invoice sira.
Tanba problema divida nee simu informasaun antes kedas halo viajen semana rua liu ba, momentu Primeiru Ministru iha hela Nova Iorke, Nasaun Unidas, Xefe Estadu halo kontaktu kedas iha informasaun neebe mai husi Gabinete Primeiru Ministru, mai husi Ministra Saude.
Nia hatutan, loos duni iha divida todan Estadu Timor nian ho hospital sira nee maibe divida mai husi tinan lubuk ida ba kotuk, laos foin mak mosu, imposivel milhaun US$ 20 deve tinan ida, divida sira nee hakiduk ba too 2014 la selu tanba problema oin-oin.
“Hau simu informasaun orden fo tiha ona atu halo prosesamentu investiga haree didiak konta sira nee hotu halo pagamentu, pagamentu balun halo daudauk ona nee mak hau rona. Ita nuudar estadu, governu tenke kuidadu, Ministeriu Finansas tenke kuidadu atu Timor nia naran moos, morin ita nunka bele husik divida la selu, se osan iha selu kedas, labele iha razaun ruma atu demora, hau kompriende Ministeriu Finansas, instituisaun governu nian tenke kuidadu atu halo pagamentu, tanba hospital sira nee balun hau hatene uluk, hospital rasik aprezenta envoice falsu aumenta kust,” dehan PR, Horta.
Xefe Estadu hatete, governu rasik investiga sira husu deskulpa, nunee Xefe Estadu kompriende Ministeriu Finansas demora tanba Ministériu Finansas iha responsabilidade mak ida nee laos selu ho taka matan, maibe atu investiga nee tenke investiga lalais labele demora.
Nunee mos iha loron 24 Setembru 2024 Visi Ministru Asuntu Parlamentar, Adérito Hugo da Costa hatete, Governu sentral liu husi Primeiru Ministru (PM), Kay Rala Xanana Gusmão, orienta ona Ministeriu Saude (MS) atu rezolve lalais hodi selu dívida iha Ospital Malazia, Singapura no Indonezia.
No iha Orsamentu Jeral Estadu (OJE) 2023 ho Orsamentu Rtifikativu 2023 no OJE 2024 prevee atu selu dívida sira-nee, maibe ministeriu akompanha hela Ospital sira nee tanba husi MS proninsia dezde inísiu katak, tanba ho montante neebe aumenta boot, entaun antes sira halo pagamentu tenke halo investigasaun ka auditoria.
“Orientasaun husi Konselhu Ministru liu husi Primeiru Ministru ba Ministeriu Saude, atu imediatamente halo kontaktu ho Ispital sira nee atu rezolve asuntu nee ho lalais,” dehan nia.
(eme)
