DILI, STLTIMORLESTE.com – Prezidente Republika (PR), Jose Ramos Horta husu sarani sira reza ba Padre Domingos Maubere nia saude, nunee bele re-koopera.
Prezidente Republika Jose Ramos Horta hatoo lia hirak nee ba jornalista sira iha salaun Multizu Bebora, kuarta (14/05/2025).
Nia hatete, husu sarani sira hotu nafatin reza ba Padre Domingos Maubere neebe oras nee halo hela tratamentu iha Hospital Nasional Guido Valadares (HNGV) atu bele re-koopera lalais, nunee bele haklaken Nai nia liufuan ba sarani sira.
Prezidente dehan, padre moras uluk baixa iha Malazia, Prezidente Republika sempre akompanha liu husi simu informasaun husi telefone.
“Nee tinan hira ona, bainhira moras ba tratamentu iha Malazia dala hira hau akompanha mezmu uluk nia sei diak oituan iha Malazia loron-loron haruka WP mai hau halo tratamentu iha neeba ho apoiu Governu ho apoiu ita nia embaixada iha neeba hau sempre hetan informasaun, fila hasoru nia. Ita hotu hatene kankru nee Timoroan hira hetan kankru no la salva o sorte hetan kankru nee loron ohin fulan sira nia laran detekta hahu tratamentu bele salva maibe kankru balun mezmu hetan ohin ou detekta ohin la signifika moras nee foin mosu, moras nee subar kleur ona, kankru balun perigozu los,” katak PR Horta.
Xefe Estadu dehan, tratamentu antes halo iha Malazia apoiu diak ba doutor sira rasik foti liman sira hatete laiha buat ida atu halo entaun fila mai Timor doutor sira iha hospital servisu 24 horas buka hamenus amu nia sofrimentu.
“Ita kontinua reza, reza, reza, tanba dala ruma akontese mos iha mundu ema ida moras boot maibe derepente diak fali, labele lakon esperansa maibe hau rasik mos haree Amu Papa iha Roma iha hospital hau akompanha laos loron-loron kuaze oras oras hau simu boletin, hau kontente los bainhira nia sai husi hospital, maibe derepente hau viajen ba Vulgaria iha kareta laran mensajen mai husi roma Amu Papa iis kotu, hau triste los,” katak PR Horta.
Prezidente mos iha hanoin katak, Amu Papa labele aguenta tanba nia saude grave no idade ona, maibe ho Padre Domingos, hotu hotu nafatin halo orasaun nunee bele re-koopera lalais.
“Amu Maubere mos ita mehi hein milagre nee akontese, kuandu akontese duni ita hotu triste diak liu prepara aan psikoloziamente,” katak Padre.
(eme)
