DILI, STLTIMORLESTE.com – Prezidente Republika (PR), Jose Ramos Horta husu sidadaun hotu aumenta produsaun kafe, tanba oras nee kafe seidauk sufisiente.
Prezidente Republika Jose Ramos Horta hatoo kestaun nee liu husi nia diskursu iha Salaun IOB, Fomentu, Sesta nee (08/08/2025).
Nia dehan, nia ema ida neebe unika halo promosaun kafe Timor Leste ba iha Mundu, maibe tuir Prezidente kafe seidauk sufisiente, tanba nee husu sidadaun hotu presiza aumenta produsaun.
“Ita nia kafe seidauk sufisiente, maibe nee mos laos problema boot ida iha rai barak-barak, maibe produtu balun mai husi rai liur mos iha ita lalika tauk konkorensia buat ida hau hatete kafe Timor nia, ema neebe iha osan hakarak sosa kafe, sosa kafe Timor Leste nia, tinan sira nee nia laran hau rasik halo kampanha boot iha mundu ba kafe Timor nia, hau unika pesoal iha mundu lori kafe tama too Bazilika São Pedro Roma, hau lori entrega ba Papa Francisco,” dehan Prezidente Republika.
Prezidente Republika hatete, bainhira lori tama kafe ba Bazilika São pedro iha Roma, Prezidente nia amigu sira haree hakfodak bainhira entrega kafe Timor Leste ba Sua Santidade Papa Francisco iha nia fatin Roma.
“Sira haree hau hakfodak hau lori fali kafe saku lubuk ida ba Vatikano, depois sira haree hau koalia ho Amu Papa, ita nia kafe laiha problema maibe ita tenke buka aumenta produsaun nee mak hau hatete aumenta produsaun, ita nia kafe seidauk barak, ita nia kafe organika, se bele karik favor hatete ba joven sira labele oho laku,” katak PR Horta.
Iha biban nee Prezidente Republika husu sidadaun sira aumenta produsaun kafe no labele oho laku, tanba kafe laku ten kilo ida iha Hongkon US$ 50, oinsa mak Timor bele manan US$ 50 kilo ida, se Governu ho matenek buka kontrola kadeia komersiu nia husi kafe hun too merkadu Singapura ka neebe deit.
“Se o uza fundu petroliferu ba kria instituisaun ida para halo kontrola marketing iha exportasaun distribuisaun kafe nia nee diak bele halo nunee, Timor rasik bele halo kontratu ho konsumidor sira iha Hongkon, por ezemplu ida nee bele halo,” katak Horta.
Aleinde nee Timoroan sira bele halo mos produsaun ba kakau tanba prezidente haree nia produsaun diak foin lalais balun halo exportasaun ona alende nee Timor nian kadiuk mos diak.
(eme)
