MALIANA, STLTIMORLESTE.com – Prezidente Republika (PR), Jose Ramos Horta hatete, Igreja nia papel importante hodi tau matan ba area edukasaun.
Prezidente Republika Jose Ramos Horta hatoo kestaun nee, bainhira vizita Colegio Infante de Sagres no Uma Esperansa iha Maliana, Tersa (13/01/2026) hatete, tuir nia haree igreja nia servisu iha setor edukasaun importante tebes, no Governu tau osan boot ba igreja liu husi Conferencia Espiscopal Timorense (CET), ida nee halo Prezidente kontente, podia aumenta tan atu igreja bele aumenta tan Escola Colegio, asrama/Orfanatu, iha teritoria Timor laran, tanba ema sei moris kiak, iha problema trauma oin-oin.
Prezidente vizita informal ba Colegio Infante de Sagres iha Maliana, eskola katoliku ida neebe iha valor istoriku no kontribuisaun signifikativu iha setor edukasaun nasional.
Colegio Infante de Sagres hahu servisu husi tempu administrasaun Português no inaugura iha tinan 1960 husi Don Martinho da Costa Lopes. Depois independensia, eskola nee hetan rehabilitasaun iha tinan 2014 liu husi Governu, hamutuk ho Igreja Katoliku, hodi garante kontinuidade servisu edukasaun ho kualidade.
Durante vizita nee, Prezidente Ramos Horta apresia kondisaun infraestrutura eskola nian no kualidade aprendizajen neebe diak tebes. Kolejiu refere agora atende estudante hamutuk nain 353, feto nain 180 no mane nain 173, ba nivel masculinu no femininu.
Prezidente sublina, importansia papel Igreja Katolika iha setor edukasaun, liu husi padre sira no ekipa manorin nain sira neebe kontinua tau matan ba formasaun akademika no moral ba jerasaun foun sira.
“Ita haree igreja nia servisu iha setor edukasaun importante tebes, Governu tau osan Boot ba igreja liu husi Conferencia Espiscopal Timorense (CET) hau kontenti ho ida nee. Podia aumenta tan atu Igreja mos bele aumenta tan Escola Colegio, asrama/Orfanatu, iha teritoria Timor Laran, tanba ema sei moris kiak, iha problema trauma oin-oin neebe barak loos,” hatete Prezidente Republika.
Prezidente Republika dehan, Estadu iha limitasaun rekursu umanu atu responde ba problema sosial no trauma neebe enfrenta husi labarik sira no Prezidente konsidera katak instituisaun relijiozu, liuliu Padre no madre sira, iha vokasaun, esperiensia no kapasidade atu akompana labarik sira iha prosesu reabilitasaun sosial.
“Igreja haree mos asuntu nee tanba Governu laiha meus umanos, tanba atu tau matan ba labarik sira nee ba sira nia edukasaun ba sira nia trauma oin-oin nee so Relijiosu relijiosa madre sira mak bele tau matan tanba laos vokasaun Estadu ka Governu nian, Governu nia vokasaun mak tau osan” maibe se mak ezekuta ema neebe iha esperiensia, iha matenek, Pasiensia no iha fuan atu haree problema sosial sira nee.
Aleinde nee Prezidente Republika mos halo vizita ba Dormitoriu Feminina Uma Esperansa, iha Aldeia Oplegor, Suku Holsa, Postu Administrativu Maliana, neebe tau matan husi madre relijioza Kongregasaun Servas do Espírito Santo (SSpS).
(eme)
