DILI, STLTIMORLESTE.com – Prezidente Republika (PR), Jose Ramos Horta hatete, Governu kansela investimentu Pelican Pardise nee desizaun husi Governu.
Prezidente Republika Jose Ramos Horta hatoo kestaun nee ba jornalista sira, bainhira remata vizita ba Jakarta no fila hikas mai Timor Leste iha Aeroportu Internasional Nicolau Lobato, Bairo Pite Tersa (24/03/2026).
Nia hatete, Governu kansela nee desizaun Governu nia no prosesu nee mos lao tinan 15, laos deit pelican paradise nia sala maibe Governu mos tinan hira nia laran la kumpre mos kompromisu neebe iha akordu halo nee.
“Nee laos deit pelican paradise nia sala maibe Governu mos tinan hira nia laran la kumpre mos kompromisu neebe iha akordu halo nee. Porzemplu Governu mak tenke dada eletrisidade, Governu mak tenke dada bee ba fatin, maibe pelican paradise mos podia hatudu inisiativa buat sira nee podia halo kedas, portantu iha urjente atu halo Hotel ida 5 estrela centro Convensaun ba simeira ASEAN nian, entaun hau konkorda Governu halo ida nee,” dehan PR Horta.
Prezidente Republika hatete, iha fatin seluk rai balun iha Dili laran iha Hera entrega ba investor balun nasional no Internasional sira la halo, buat ruma diak liu Governu halo hanesan rai boot ida besik Hera, Prezidente la hatene se mak okupa maibe rai nee diak tebes no Prezidente hatete ona ba Primeiru Ministru haree mos rai iha Hera.
Karik Governu kansela rai tasi Tolu nee Governu presiza investe fali ba saida? Hatan ba kestaun nee Prezidente Republika hatete, Governu nia preokupasaun atu halo hotel ida 5 estrela cento Convencao presiza ba simeira 2029.
“Nee mak hau hanoin Governu nia intensaun, Governu nia intensaun mos ita boot sira rona tiha ona atu halo centro Convencao iha Portu Dili, foin daudaun semana ida liu ba koalia ho maun Xanana nee mos sei kontinua planu nafatin maibe ita presiza Hotel laos ida ka rua preziza fatin lubuk ida, hotel fatin ba embaixada sira husu atu loke iha nee ita hanesan stres oituan la konsege rai, nee duni Governu halo desizaun se mak simu tiha rai atu halo dezenvolvimentu maibe la halo Governu kaer fila fali entrega ba se mak iha kapasidade finanseira kbiit para halo,” dehan PR Horta.
Aleinde nee Governu liu husi Ministeriu Koordenador ba Asuntu Ekonomiku (MKAE) deside kansela investimentu husi Pelican Paradise, liu-liu ba konstrusaun Hotel fitun lima iha Suku Tíbar, Postu Administrativu Bazartete, Munisipiu Likisa.
Tuir Vise Primeiru Ministru no Ministru Koordenador ba Asuntu Ekonomiku no Ministru Turizmu no Ambiente, Francisco Kalbuadi Lay, hatete kona-ba konstrusaun Pelican Paradise, Governu mos konxiente ida-nee no nia parte hamutuk ho Ministru Justisa, Sergio Hornai, halo koordenasaun serbisu hodi dasida no bares mes ho parte legalhodi deside no haree mos ho parte legal sira kona-ba asuntu lubuk ida.
“Hatoo ona ba senor ida neebe atu halo investimentu tinan 15 nunka halo nee ami sei kansela. Nee desizaun no hau husu tiha orientasaun husi Primeiru Ministru konkorda ona ho ida-nee”, dehan Visi PM, Kalbuadi Lay.
Aleinde nee kontrusaun nee asina ona plaka no halo lansamentu fatuk dahuluk, iha 25 Novembru 2022, ba futuru konstrusaun Hotel fitun lima nee husi Prezidente Republika, Jose Ramos Horta, eis Primeiru-Ministru, Taur Matan Ruak, no Prezidente Pelican Paradise Datuk Dr, Edward Ong.
(eme)
