DILI, STLTIMORLESTE.com – Prezidente Republika (PR), Jose Ramos Horta kondekora Grau Kolar Ordem Timor Leste (TL) ba Embaixador Japaun mai nasaun nee, ba misaun diplomatika neebe esepsional.
Serimonia kondekora nee halao iha Palasiu Prezidensial Nicolau Lobato, Tersa (16/12/2025).
Iha biban nee Prezidente Republika Jose Ramos Horta hatete, serimonia nee hanesan despedida ho Embaixador Japaun ho kondekorasaun mais alto nivel kolar ordem de Timor, tanba embaixador nee tinan 3 iha nee nia halo serbisu barak hametin relasaun no halo inisiativa oin oin koperasaun diak tebes no boot bolsu estudu ba timor oan sira projetu boot sira nee hanesan konstrusaun naval iha Laleia neeba.
“Iha tinan sira nee nia laran nee 20 resin ona mai nee investimentu neebe boot liu mak konaba ofisina naval, konstrusaun naval atu konstrui Roo ahi bobot sira ezemplu lakon osan boot US$ 30 miloens ho Dr Mari Alkatiri nia projetu ba Roo Haksolok too agora laiha rejultadu,” dehan PR Horta.
Orden TL mak nasaun nia onra aas liu, neebe fo ba individu sira neebe halao ona servisu esepsional no meritu ba nasaun nee. Embaixador Kimura simu kondekorasaun ida-nee tuir dekretu Prezidente Republika No.131 /2025, nuudar rekonesimentu ba ninia servisu esepsional hodi aprofunda relasaun bilateral entre TL no Japaun.
Diplomata kareira ida-neebe distintu dezde tinan 1986, Embaixador Kimura serbisu nuudar Embaixador ba Asuntu Ekonomiku no Sosial sira iha Nasoins Unidas iha Nova Iorke, Konsul Jeral iha Munich, no Diretor-Jeral Ajensia Desportu Japaun nian.
Embaixador Kimura halao knaar nuudar Embaixador Japaun nian mai TL hahu iha Dezembru 2022.
Prezidente Republika Ramos Horta dehan, durante ninia mandatu, relasaun bilateral entre nasaun rua eleva ba ” Parseria Komprensivu” liuhusi vizita altu nivel husi Primeiru-Ministru Kay Rala Xanana Gusmão iha Dezembru 2023 no Prezidente Jose Ramos-Horta iha Agostu 2025.
Kooperasaun dezenvolvimentu nian avansa signifikativamente iha Embaixador Kimura nia lideransa, neebe marka ho konstrusaun sala ospital foun sira, sentru partus 20, no konstrusaun terminal aeroportu neebe atu hahu, hamutuk ho projetu infraestrutura rural 155 neebe remata tiha ona. Inisiativa xave sira habelar, inklui programa kultivasaun ai-funan fresku no inísiu investimentu boot Japaun nian iha konstrusaun roo no enerjia solar. Ligasaun entre povu ho povu fortalese liu husi programa treinu internu tekníku neebe hahu iha 2023 ho formandu Timoroan liu nain 60 mak agora serbisu iha Japaun iha setor oioin. Kursu sira lian Japaun nian loke ona inklui iha UNTL, ho timoroan liu 40 hahu sira nia estudu iha Japaun no juventude timoroan hamutuk 100 resin vizita Japaun liuhusi programa JENESYS iha tinan tolu ikus nee.
Iha biban nee Embaixador Japaun ba TL Kimura Tetsuya ho matanben hatoo agradese ba Prezidente Republika neebe entrega ona kondekorasaun ba nia.
“Onra boot ida mai hau atu simu kondekorasaun ida nee ohin loron. Hau agradese tebes ba konsiderasaun diak husi Prezidente. Ida-nee momentu ida neebe emosionante tebes ba hau hafoin tinan tolu servisu iha TL,” katak nia.
Jornalista: Emerenciana Pinto
Editora: Domingas Gomes
