DILI, STLTIMORLESTE.com – Prezidente Republika (PR), Jose Ramos Horta kondekora kolar Ordem Timor Leste ba Oftalmologista Suisu ba ninia kontribuisaun ba setor saude nasaun nian.
Prezidente no Laureadu Nobel ba Pas, Jose Ramos Horta kondekora Kolar Orden Timor Leste ba PD. Dr. Andreas Josef Kreis, MD, distintu oftalmologista Suisu, hodi rekonese ninia dekada servisu esepsional no dedikadu ba setor saude Timor Leste nian. Premiu prestijiadu nee konfere tuir Dekretu Prezidente Republika Nu. 118/2025, neebe realiza iha Piazza della Republika iha Roma, Italia.
Orden Timor Leste nian mak nasaun nia onra aas liu, neebe fo ba indivídu sira neebe halao ona servisu esepsional no meritoriu ba nasaun nee.
PD. Dr. Andreas Josef Kreis, MD, konsultor Oftalmologista no sirurjiaun Oftalmologista Suisa nian, hahu’ envolve ho Timor-Leste bainhira nia serbisu iha Centre for Eye Research Australia no Royal Victorian Eye and Ear Hospital iha Melbourne. Ninia kompromisu lori nia atu muda diretamente ba Timor-Leste hodi servisu hamutuk ho The East Timor Eye Program (ETEP).
Harii iha tinan 2000 husi Oftalmologista australianu Dr. Nitin Verma, The East Timor Eye Program (ETEP) mak programa komprensivu saude matan nian neebe dedika ba tratamentu matan-delek neebe bele prevene no harii servisu nasional kuidadu matan neebe sustentavel ba povu Timor-Leste liuhusi servisu klíniku, formasaun, no mentorizasaun.
Nuudar konsultor tempu naruk, xefe ekipa, no espesialista vizitante, Dr. Kreis sai instrumental iha dezenvolvimentu servisu oftalmolojiku iha Timor-Leste. Nia halao ona papel sentral ida hodi orienta no fó formasaun ba jerasaun foun oftalmologista Timoroan sira, nunee konsolida fundasaun sira husi sistema kuidadu matan nasaun nian.
Prezidente Ramos Horta elojia Dr. Kreis nia kompromisu neebe boot tebes, hodi afirma: “Dr. Andréas Kreis reprezenta amizade no solidariedade internasional neebe diak liu.
“Durante tinan barak nia laran, nia fahe ho laran-luak ninia esperiensia hodi restaura vizaun no harii futuru sustentavel ba oftalmolojia iha Timor Leste. Liu husi mentoria ba ita-nia doutor joven sira, nia laos deit ajuda ona kura indivíduu sira maibe ajuda ona konsolida fundasaun sira husi ita-nia sistema saude nasional. Premiu ida-nee nuudar jestu kiik ida husi ita-nia nasaun nia agradesimentu neebe profunda no duravel.” dehan PR Horta Liu husi Komunikadu, Sesta (21/11/2025).
Prezidente sublina liutan katak Dr. Kreis nia serbisu sai fundamental hodi promove amizade entre povu sira no kontribui diretamente ba pas, estabilidade nasional no dezenvolvimentu Timor Leste nian.
Jornalista: Emerenciana Pinto
Editor: Xisto Mendonça
