DILI, STLTIMORLESTE.com – Prezidente Republika (PR), Jose Ramos Horta kondekora sidadaun nain 107, iha serimonia selebrasaun proklamasaun independensia ba dala 49.
Prezidente Republika Jose Ramos Horta realiza serimonia kondekorasaun ba sidadaun Timoroan nain 107 Kolar Ordem Nicolao Lobato, iha Palasiu Prezidensial Bairo Pite, Tersa (26/21/2204).
Iha biban nee, Veteranus David Dias Mandati liu husi diskursu hatete, ohin Prezidente Republika Jose Ramos Horta kondekora sidadaun nasional hamutuk nain 107, hodi fo konhesimentu ba sira nia luta neebe durante nee kontribui ba ukun rasik aan.
Veteranus dehan, serimonia kondekorasaun ba sidadaun nasional sira, hodi komemora serimonia proklamasaun independensia Timor Leste ba dala 49.
“Serimonia kondekorasaun nee iha eventu selebrasaun loron proklamasaun independensia TL ba dala 49, hodi fo kondekorasaun ba sidadaun neebe mak kontribui ba luta libertasaun nasional TL too hetan ukun rasik aan,” katak nia.
Nunee mos Veteranus Jose Filomeno Siquera Kodigu Tatoras, Responsavel Zona Nain Feto hatete, sente kontente tebes ohin marka tan pasu importante ida, tanba Prezidente Republika Jose Ramos Horta bele fo kondekorasaun ba Veteranus sira neebe durante kontribui ba luta libertasaun nasaun.
“Sente kontente tanba hanesan responsavel masimu husi Nain Feto, sente kontente tanba hau nia ema sira ikus-ikus nee simu hotu ona, maske idade avansadu lao labele, maibe bele mai too iha fatin ida nee hodi simu medalha hodi hanoin kona-ba memoria luta neebe naruk,” katak nia.
Nia hatete, maske membru sira neebe mak ohin simu kondekorasaun ho Prezidente balun moras, maibe konsege mai duni hodi simu sira nia direitu ida nee.
Biban nee Prezidente Republika Jose Ramos Horta hatete, serimonia kondeorasaun laos ba Timoroan deit, maibe ba mos sidadaun estranjeiru balun neebe mak fo nia kontribuisaun ba luta libertasaun TL nian hodi hetan ukun rasik aan.
(eme)
