DILI, STLTIMORLESTE.com – Prezidente Republika (PR), Jose Ramos Horta fo konfiansa 100% ba Primeiru Ministru Kay Rala Xanana Gusmão, sei halo negosiasaun fronteira terrestre no fronteira maritima ho Indonezia sei lao diak.
Liafuan nee Prezidente Republika Jose Ramos Horta haktuir ba jornalista bainhira remata hasoru malu ho estudante sira husi Oecusse iha Palasiu Prezidensial Nicolau Lobato, Bairo Pite, Kinta (11/12/2025).
Nia hatete, nia iha konfiansa tomak ba Primeiru Ministru no iha esperansa sei halo negosiasaun konaba fronteira terrestre no fronteira maritima sei lao ho diak no susesu, tanba Indonezia ho TL iha relasaun neebe metin.
“Hau konfiansa 100% ba Xanana nuudar líder nasional, nuudar Primeiru Ministru neebe kaer negosiasaun fronteira terrestre, fronteira marítima, ita relasaun metin ho Indonezia,” dehan Horta.
adaun nee Primeiru Ministru Kay Rala Xanana Gusmao halo hela negosiasaun formal segunda ronda kona-ba fronteira maritima neebe halao iha Jogjakarta, lori satisfasaun ba ekipa negosiador husi TL ho Republika Indonezia (RI) tanba konsege koalia ba malu, simu ideia no iha vontade atu avansa ba etapa tuir-mai.
Primeiru-Ministru (PM), Kay Rala Xanana Gusmão observa katak, durante prosesu negosiasaun iha ronda da-ruak nee ekipa hosi parte rua hatudu vontade boot neebe hakarak tebtebes atu rezolve duni fronteira marítima rai rua nian.
Negosiasaun formal primeira ronda halao iha Agusto 2025, iha Dili no segunda ronda halao iha Jogjakarta. Ekipa konkorda ona atu kontinua negosiasaun formal tuir-mai iha Abríl 2026.
Jornalista: Emerenciana Pinto
Editora: Domingas Gomes
