DILI, STLTIMORLESTE.com – Prezidente Republika (PR), Jose Ramos kongratula populasaun Xineza iha Timor Leste, neebe selebra festival Primavera Xina nian.
Eventu ida nee ho tema “Esperiensia Arte no Kultura Xineza Nia Furak – Festa Selebrasaun Festivál Primavera Xineza nian”, mak oportunidade furak ida atu apresia rikusoin no furak husi ema identidade neebe fahe.
Iha diskursu Xefe Estadu hatete, nia parte senti kontente, tanba bele hamutuk ho ema hotu hodi selebra Tinan Foun Xina, Festivál Primavera nian, tempu ida renovasaun nian, esperansa nian no unidade nian.
Tuir Xefe estadu, Selebrasaun sira Festival Primavera nian iha signifikadu uniku, hodi fo hanoin ba ema hotu kona-ba importansia família nian, tradisaun no forsa husi lasu sira neebe halibur ita iha komunidade Timorense nia laran.
“Hau hatoo hau nia votu ba sua exelensia Embaixadora Wang Wenli, pesoal Embaixada nian, no komunidade Xina iha Timor Leste. Atu Tinan Foun “Ular” nian ida nee sai prosperu, ksolok no nakonu ho realizasaun sira,” hatete Prezidente Republika (PR), Jose Ramos liu husi diskursu iha Salaun Multiuzu, Bebora , (17/01/2025).
Horta hatutan, patrimoniu kultural neebe Xina iha Timor Leste hatutan husi jerasaun tuir-tuir malu husi imigrante Timoroan no Xines sira, reflete istoriia mileniu ho impaktu sira neebe dura ba rejiaun no mundu.
Nia dehan, amizade entre Timor Leste ho Xina harii iha fundasaun sólidu respeitu ba malu, konfiansa no kooperasaun.
(alb)
