DILI, STLTIMORLESTE.com – Prezidente Republika (PR), Jose Ramos Horta kongratula Prezidente Angola Eleitu Nuudar Prezidente Foun Uniaun Afrikana.
Iha loron Tersa (18/02/2025) Prezidente Republika Jose Ramos Horta hatoo parabens ba João Manuel Gonçalves Lourenço, Prezidente Republika Angola, ba ninia eleisaun foin lalais nee nuudar Prezidente Uniaun Afrikana (UA).
Prezidente Lourenço asumi Prezidensia rotativa UA nian durante Sesaun Ordinaria ba dala 38 husi Asembleia Xefe Estadu no Governu nian neebe halao iha Adis Abeba, Etiopia, iha loron 15 fulan Fevereiru tinan 2025. Nia troka Prezidente Mohamed Ould Cheikh Ghazouani husi Mauritania, neebe desempenha funsaun nuudar prezidente durante tinan 2024.
Iha ninia karta ofisial parabens ba Prezidente Lourenço, fo sai iha loron 17 Fevereiru 2025, Prezidente Ramos Horta nota katak nomeasaun nee rekonhese Prezidente Lourenço nia dedikasaun no kompromisu metin ba progresu Angola no kontinente Afrikanu nian.
Prezidente Ramos Horta mos elojia Prezidente Lourenço nia diskursu aseitasaun, neebe trasa vizaun ida neebe klaru ba promove unidade, rezolve konflitu sira, no rezolve dezafiu global sira neebe afeta rejiaun nee.
Prezidente Ramos Horta sublina katak, Timor Leste fahe valor fundamental sira ho Angola no Uniaun Afrikana, hodi afirma “Ami fiar katak ita nia lideransa sei kontinua hametin kooperasaun rejional no internasional, promove pas, estabilidade no dezenvolvimentu sustentavel,” dehan PR Horta.
Simeira UA ba dala 38 neebe halao iha loron 15-16 Fevereiru tinan 2025, adopta tema Justisa ba Afrikanu sira no Ema ho Dessendensia Afrikana liu husi reparasaun ba tinan 2025.
Iha nia papel nuudar Prezidente foun UA nian, Prezidente Lourenço promete ona atu foka ba hakotu konflitu sira iha Afrika, responde ba mudansa inkonstitusional sira governu nian, kombate terorizmu, no hasoru dezafiu sira relasiona ho mudansa klimatika no ameasa saude publika.
Prezidente Ramos Horta hatutan, Timor Leste nia kompromisu atu aprofunda dialogu no parseria ho Uniaun Afrikana ba benefísiu mutuu sira nia povu.
(eme)
