DILI, STLTIMORLESTE.com – Prezidente Republika (PR), Jose Ramos Horta hatete, nia konkorda ho idea husi Primeiru Ministru Kay Rala Xanana Gusmão nomos Sekretariu Jeral Partidu FRETILIN atu hasai lei pensaun vitalisi, maibe presiza muda lei anterior.
Prezidente Republika Jose Ramos Horta hatoo kestaun nee ba jornalista sira iha Palasiu Prezidensial Bairo Pite, Sesta nee (25/07/2025).
“Nee hau konkorda, hau fo parabens ba ita nia avo Nana no Avo Mari konkorda nee diak ona nee ita tuir ita nia avo nain rua, portantu hau hatete ita hamate tiha lei atual bele halo lei foun ida, tanba deputadu balun neebe tinan 20 ona bele pensaun vitalisia maibe pensaun vitalisia nee bele laos 100% bele 65% tenke haree nee,” katak PR Horta.
Sira neebe mak hetan ona direitu arkeridu tenke mos haree didiak bele taka derepente, por ezemplu bele halo negosiasaun no sira neebe mak tinan 5 deit iha parlamentu no governu mak simu tan pensaun vitalisia nee labele.
Iha biban nee Prezidente Republika mos hatete, sira neebe asumi kargu tinan 5 deit iha Parlamentu no Governu mak simu hotu pensaun vitalisia ida nee mos ladun diak, tanba nee presiza muda lei. Se hetan pensaun entau ba tinan 5 nia deit hotu entaun hotu ona.
“Hau kontente ita halo revizaun ba ida nee, tenke haree mos situasaun veteranus sira nia, tanba maneira halo daudaun nee veteranus la funsiona, osan boot ba veteranus sira maibe sira nia situasaun moris barak la diak, tanba sira la investe didiak osan neebe sira simu tenke haree bele tulun sira nunee osan neebe sira simu husi veteranus nee fo imprestimu ba sira aplika didiak para sira halo bisnis ruma, la presiza nafatin ajuda husi Estadu,” hakotu PR Horta.
Primeiru Ministru Kay Rala Xanana Gusmão hatete, nia parte konkorda bainhira deputadu sira konkorda hasai lei pensaun Vitalisia.
Primeiru Ministru Kay Rala Xanana Gusmao hatete, se deputadu sira iha Parlamentu Nasionál konkorda hamoos lei pensaun vitalisia, PM konkorda.
Foin lalais deputadu sira balun iha Parlamentu Nasional hatete sei koalia ho deputadu husi bankada iha Parlamentu Nasional atu bele hasai lei pensaun vitalisia oinsa PM nia hanoin ba ida nee, hatan ba kestaun nee Primeiru Ministru hatete, se mak foti sae atu hasai lei pensaun vitalisia.
“Se mak foti sae ida nee, se mak foti ida nee,” katak Primeiru Ministru Kay Rala Xanana Gusmão.
Foin lalais deputadu husi Bankada CNRT, Deputadu Duarte Nunes mak hatete katak sei kordena ho deputadu sira iha Parlamentu Nasional atu bele hasai tiha pensaun vitalisia, hatan ba kestaun nee PM hatete, ida nee laiha problema. “No Problem diak liu tan, no problem,” dehan Primeiru Ministru.
“Hau ema ida, hau nia suara ema ida nia, ita boot nia suara boot, hau nia lian ema ida nia konforme maioria hau la kontra ,” katak PM Xanana.
Sekretariu Jeral Partidu FRETILIN, Mari Alkatiri hatete, nia aseita ho deklarasaun husi Bankada Partidu CNRT atu halakon pensaun vitalisia ba eis titulares sira.
“Hau prontu, hau prontu, mais keta kolia hanesan nee atu buka votus deit karik,” hatete Mari.
Alkatiri afirma, nia aseita ho deklarasaun Bankada Partidu CNRT atu halakon lei pensaun vitalisia nee maibe tenke tau iha pratika no labele halo fali deklarasaun ida atu buka votus iha eleisaun tuir mai.
Foin lalais Xefe Bankada Partidu CNRT, Duarte Nunes hateten, sei konsulta ho lider Bankada iha Parlamentu Nasional atu deskuti lei pensaun vitalisia.
“Pensaun vitalisia nee ba hotu-hotu, se hotu-hotu agora ita tama mai hotu-hotu konkorda, hau lee iha media, hau rezista tiha iha hau nia ajenda, hau sei konsulta iha líder bankada mak hotu-hotu konkorda, hau konsulta ho partidu ita avansa,” hateten Duarte Nunes.
Duarte rezeita deklarasaun husi Partidu FRETILIN neebe dun Bankada Partidu CNRT mak lakohi diskute lei pensaun vitalisia nee, maibe atu diskute lei pensaun vitalisia nee presiza deputadu hotu-hotu nia kontribuisaun.
(eme)
