DILI, STLTIMORLESTE.com – Prezidente Republika (PR), Jose Ramos Horta konkorda halo emenda revizaun ba konstitusional.
Prezidente Republika Jose Ramos Horta hatoo kestaun nee ba jornalista sira bainhira remata vizita Estadu ba Japaun fila hikas mai Timor Leste iha Aeroporto Internasional Nikolao Lobato, Komoro, Sesta (29/08/202).
“Hau hanoin diak tanba iha rai hotu hotu tinan 25 liu tiha bele halo emenda konstitusional, ita nia konstituisaun mos remata ida nee sei presiza emenda buat ruma ka lae. Nee depois komisaun neebe sei responsavel halo draf projetu emenda sei haree depois sei lori ba parlamentu. Hau konkorda saida los hau iha idea konstituisaun foun mai nee sei aprezenta hau nia idea nee bele hatete uniku iha mundu no uniku iha Timor bele halo, bele foti Timor nia naran iha mundu se rona hau nia rekomendasaun,” katak PR Horta.
Xefe Estadu hatete, se hakarak foti Timor nia naran iha mundu bele rona mos Prezidente Republika nia hanoin nee sei bele ajuda jestaun fundu publiku estadu nia propriedade estadu nia sei lao diak liu i kualidade Governu no parlamentu sei diak liu sei gasta osan menus.
“Buat balun tau iha konstituisaun para konstituisaun hatete Governu labele boot liu duke 20 membru, konstituisaun bele hatete Ministru sira deputadu sira laiha direitu ba uma, tanba ita idak idak iha uma kuandu Primeiru Ministru eleitu bolu ita ba Governu, o mai husi o nia uma iha Bekora, Becusse ba neebe deit laos iha Ponte Komoro okos,” katak nia.
Prezidente Republika dehan, tenke hatudu ba povu no ba mundu katakTL rigorozu despeza estadu nia, maibe buat sira nee tenke tau iha konstituisaun hodi trava, nunee membru Governu 25 too 20, nunee labele liu.
“Hau sei arkivu partisipa iha emenda konstitusional,” katak Prezidente Republika.
Jornalista: Emerenciana Pinto
Editora: Domingas Gomes
