DILI, STLTIMORLESTE.com – Prezidente Republika(PR), Jose Ramos Horta hatete, Estadu ladun tau atensaun makaas ba Defensoria Publiku.
Prezidente Republika Jose Ramos Horta hatoo kestaun nee ba jornalista sira, bainhira remata partisipa serimonia tomada de pose ba Inspetor Xefe Defensoria Publika iha sede defensoria Publika Balide, Segunda (05/05/2025).
Prezidente Republika hatete, Defensoria Publiku ladun hetan atensaun makaas husi Governu, laos Governu agora deit maibe dezde kedas Timor hetan indepedensia iha 2002.
“Defensoria Publiku ladun hetan atensaun makaas husi estadu, se temi Estadu husi Governu laos agora deit, dezde hahu kedas 2002, tenke fo rekursu makaas liu, rekursu nee signifika infraestrutura para sira servisu diak, hau uluk mai iha nee dala hira ona manas los iha laran, hau mak iha nee karik manas liu hau lori hau nia laptop tuur iha ai hun ida fresku liu duke laran, kondisaun la diak liu atu servisu, ekipamentus transporte depois formasaun kontinua ba sira,” katak PR Horta.
Prezidente Republika hatete, presiza aumenta rekursu liu-liu hadia infraestrutura, apoiu mos ekipamentus no kontinua fo mos formasaun, formasaun nee bele halo iha rai laran ou haruka ba liur lalika kleur fulan 6 ou tinan 1 iha Brazil, Portugal ka iha neebe deit liu-liu rai rua temi nee para hasae sira nia kapasitasaun.
Aleinde nee Prezidente Republika mos entrega material ba Defensoria Publiku, karik material saida deit? Hatan ba kestaun nee Prezidente Republika hatete, ida nee kontribuisaun kiik ida neebe fo ba defensoria Publika, se iha tan kontinua apoiu hanesan fo mos ba instituisaun seluk.
“Hau hetan apoiu nee husi kolega no amigu sira balun iha Hongkon balun iha Japaun, hau husu ba sira tantu hau sei haree tan saida mak bele kompletu liu tan para bele fo apoiu makaas liu neebe mai husi fontes privadu, tanba hau hatene Estadu iha orsamentu neebe iha limite ida difisil atu satisfas fo resposta ba pedidu husi setor hotu-hotu,” katak PR Horta.
Prezidente hatete, ho orsamentu Governu neebe limite atu resposta ba pedidu husi setor hotu-hotu, Prezidente buka liu husi setor amigu liu-liu mak Japaun ho Korea do Sul, Hongkon nee mak Prezidente iha rede neebe forte liu. Sira sempre ajuda buat barak.
Prezidente dehan, apoiu material neebe mak entrega ba Defensoria Publiku nee laos barak maibe oituan ho signifikativu.
Tuir observasaun neebe mak STL hetan, material eletronika neebe apoiu husi Prezidente Republika ba defensoria publiku mak hanesan Laptop no material seluk tan.
(eme)
